စကားချီး
လွတ်လပ်ခြင်း၏ရနံ့
တီထွင်ဖန်တီးခြင်းဟာ လောကကြီးမှာတော့ အကြီးဆုံး ဆန့်ကျင်ကြိုးပမ်းမှုတစ်ခုပဲ။ ကျနော်တို့ဟာ တစ်ခုခုကို တီထွင်ဖန်တီးချင်တယ်ဆိုရင် ယုတ္တိဗေဒနည်းလမ်းတွေအားလုံးကို ဆန့်ကျင်ထိုးဖောက်ထွက်ရတယ်။ မဟုတ်ရင် ကျနော်တို့ရဲ့ တီထွင်ဖန်တီးမှုဟာ ကူးချမှုသက်သက်သာဖြစ်မယ်။ မင်ခံနဲ့ကူးလိုက်သလိုမျိုးပေါ့။ ကိုယ့်ဟာ သီးခြားဝိသေသနဲ့တစ်သီးပုဂ္ဂလသက်သက်ဖြစ်နေမှ တီထွင်ဖန်တီးနိုင်တယ်။ လူအများကျင့်သုံးလက်ခံတဲ့ စိတ်ပညာ၊အပြုအမူအလေ့အထတွေနဲရောပါလိုက်ရင် ဖန်တီးဖို့မဖြစ်နိုင်တော့ဘူး။ လူအများလက်ခံထားတဲ့ စိတ်ထားမျိုးဟာ ဘာမှတီတီထွင်ထွင်ရှိတာမျိုးမဟုတ်ဘူး။ အဲဒီအတိုင်းနေလိုက်ရင် ဘဝဟာ အိပဲ့ပဲ့ဘဝကြီးဖြစ်သွားမယ်။ ကခုန်မှုကိုလည်းနားမလည်၊ ဂီတကိုလည်းနကန်းတစ်လုံးမသိ၊ ပျော်ရွှင်ဝမ်းမြောက်မှုနဲ့လည်းမနီးစပ်၊ စက်ရုပ်ဆန်လွန်းသွားမယ်။
ဖန်တီးတီထွင်သူတစ်ယောက်ဟာ လူတကာလုပ်နေကျနည်းလမ်းနဲ့သွားလို့မဖြစ်ဘူး။ သူဟာ သူ့နည်းလမ်းနဲ့သူသွားရမယ်။ သူဟာ ဘဝတောအုပ်လေးမှာ စူးစမ်းလေ့လာရမယ်။ တစ်ယောက်တည်းသွားရမယ်။ လူအုပ်ကြီးရဲ့စိတ်ထားမျိုးကနေ ထွက်ခွာရမယ်။ အားလုံးစုဖွဲ့လက်ခံထားတဲ့ စိတ်ပိုင်းဆိုင်ရာ အမူအကျင့်တွေဆီကနေထွက်ရမယ်။ လူတကာလက်ခံယုံကြည်တာတွေအတိုင်း လိုက်လုပ်တဲ့စိတ်ထားဟာ အဆင့်အနိမ့်ဆုံးစိတ်ထားပဲ။ ငတုံးတွေလို့ သတ်မှတ်ခံရတဲ့ကောင်တွေတောင်မှ အုပ်စုဖွဲ့ပြီး အရူးထနေတဲ့သူတွေထက်တော့သာသေးတယ်။ အဲဒီလို စုဖွဲ့ခြင်းမှာအကျိုးအမြတ်တော့ရှိတယ်။ လူတစ်ယောက်ဟာ အားလုံးလက်ခံထားတာကိုသာ အမှန်ဆိုပြီး ရဲရဲရင့်ရင့်ထောက်ခံရင် လူလေးစားမှုရလာတယ်။ ဂုဏ်ပြုခံထိုက်သူဖြစ်လာတယ်။
အတိတ်ခေတ်တုန်းက ဖန်တီးတီထွင်သူတွေဖြစ်တဲ့ ပန်းချီဆရာတွေ၊ အကသမားတွေ၊ ဂီတပညာရှင်တွေ၊ ကဗျာဆရာတွေ၊ပန်းပုဆရာတွေဟာ လူအထင်သေးခံလိုက်ကြရတယ်။ အရင်တုန်းက ဒါမလုပ်မဖြစ်ကိစ္စပဲ။ သူတို့ဟာ ဘိုဟီးမီးယန်းဘဝမျိုးနေထိုင်ကြတယ်။ အိမ်ခြေမဲ့တွေလိုနေထိုင်ကြတယ်။ အဲဒီလိုနေထိုင်မှလည်း သူတို့ဟာ တီထွင်ဖန်တီးနိုင်မှာ။ အနာဂတ်မှာတော့ ဒီလိုနေဖို့မလိုတော့ပါဘူး။ ကျုပ်ပြောတာ ခင်ဗျားနားလည်တယ်ဆိုရင်၊ ကျုပ်ပြောတဲ့အထဲမှာ အမှန်တရားပါတယ်လို့ခင်ဗျားခံစားမိတယ်ဆိုရင် အနာဂတ်မှာ လူတိုင်းဟာ တစ်သီးပုဂ္ဂလရှင်သန်နေထိုင်ကြလိမ့်မယ်ဆိုတာသိနိုင်တယ်။ ဘိုဟီးမီးယန်း ဘဝမျိုးမလိုအပ်တော့ဘူး။ ဘိုဟီးမီးယန်းဘဝဆိုတာကလည်း အပြောင်းအလဲမရှိ၊ ရှေးရိုးစွဲ၊ သမားရိုးကျဖြစ်တဲ့ လေးစားလောက်စရာဘဝရဲ့ ဘေးထွက်ပစ္စည်းပါပဲ။ (လေးစားခံရတာကိုဗြောင်ဆန့်ကျင်ပစ်လိုက်တာပဲ။)
ကျုပ်ရဲ့အားထုတ်မှုဟာ ကိုယ်ပိုင်ခံယူချက်မရှိတဲ့ အဖွဲ့အစည်းရဲ့ယုံကြည်ရာလိုက်ယုံနေတဲ့ စိတ်ထားကို ဖြိုဖျက်ပြီး လူတစ်ယောက်စီဟာ သူ့ဟာသူ တစ်သီးပုဂ္ဂလ လွတ်လွတ်လပ်လပ်နေသွားနိုင်ဖို့ပဲ။ အဲဒါဆို ပြဿနာလည်းမရှိတော့ဘူး။ ကိုယ့်ဘဝကို ကိုယ့်စိတ်ကြိုက်နေသွားနိုင်တယ်။ တကယ်တော့ တစ်သီးပုဂ္ဂလသမားတွေ ဆန့်ကျင်ကြိုးပမ်းနေတာကို အသိအမှတ်ပြုလေးစားခံရတဲ့နေ့မှ လူ့အဖွဲ့အစည်းဟာ တကယ် မွေးဖွားလိမ့်မယ်။ လူ့အဖွဲ့အစည်းက အခု ဗိုက်ထဲမှာပဲရှိသေးတဲ့အရွယ်။ အခုမမွေးသေးဘူး။ လူ့အဖွဲ့အစည်းကိုကြည့်ရင် ဗလွတ်ရွတ်တဖြစ်စဉ်ကြီး။ ဘာမှ အဓိပ္ပာယ်မရှိဘူးဆိုတာတွေ့နိုင်တယ်။ ကျနော်တို့ဟာ လူတစ်ယောက်စီကို သူ့လွတ်လပ်ခွင့်နဲ့သူနေဖို့ တစ်ဦးချင်းစီရဲ့ လွတ်လပ်ခွင့်ကို အသိအမှတ်ပြုဖို့၊ လုံးဝလွတ်လပ်ခွင့်ကိုပေးလိုက်ဖို့မကြိုးစားဘူးဆိုရင် လူ့အဖွဲ့အစည်းဟာ ဗလွတ်ရွတ်တဖြစ်မြဲဖြစ်နေမှာပဲ။ လွတ်လပ်ခွင့်ဆိုလို့ တစ်ယောက်ယောက်ကို အနှောင့်အယှက်ဖြစ်အောင်လုပ်လို့ ဘယ်ရမလဲ။ အဲဒီလို တစ်ယောက်နဲ့တစ်ယောက် အနှောက်အယှက်မဖြစ်အောင်နေတာကိုက လွတ်လပ်ခြင်းရဲ့ အစိတ်အပိုင်းတစ်ရပ်ပဲ။
အတိတ်တုန်းကတော့ လူတိုင်းဟာ အခြားတစ်ယောက်ရဲ့ကိစ္စကို စပ်စုကြတယ်။ သူ့ရဲ့ အတွင်းရေးတွေလည်းမရှောင်ဘူး။ စပ်စုတယ်။ လူတစ်ယောက်စီရဲ့အတွင်းရေးဟာ လူ့အဖွဲ့အစည်းနဲ့ဘာမှမဆိုင်ဘူး။ ဥပမာ ခင်ဗျားး အမျိုးသမီးလေးတစ်ယောက်ကို ချစ်တဲ့ကိစ္စဟာ လူ့အဖွဲ့အစည်းနဲ့ဘာဆိုင်လဲ။ ကိုယ့်ရဲ့ကိုယ်ရေးကိုယ်တာကိစ္စသက်သက်ပဲ။ ဒါက ဈေးလို လူတကာနဲ့သက်ဆိုင်တဲ့နေရာမဟုတ်ဘူး။ နှစ်ဦးသားအချစ်ရေးသက်သက်ပဲ။ လူသားနှစ်ဦးဟာ ချစ်ခြင်းမေတ္တာနဲ့ ခံစားချက်ခြင်းဖလှယ်နေတာကို လူ့အဖွဲ့အစည်းကြီးက ဝင်ပါစရာမလိုဘူး။ ဒါပေမယ့် လူ့အသိုင်းအဝိုင်းကြိးက မပါရမနေနိုင်တဲ့အထာနဲ့ တိုက်ရိုက်ရော သွယ်ဝိုက်ပြီးပါ ဝင်ပါကြတယ်။ ရဲသားကလည်း ချစ်သူတွေကြားဝင်ပါမယ်။ အစိုးရအဖွဲ့သားကလည်းဝင်ပါမယ်။ ဒါတွေနဲ့မလုံလောက်ဘူးထင်ရင် လူ့အဖွဲ့အစည်းက စူပါရဲသားကြီးဖြစ်တဲ့ ဖန်ဆင်းရှင်ကို ဖန်တီးလိုက်ပြီး သူက ခင်ဗျားကို တာဝန်ယူကြီးကြပ်မယ်ဆိုပြီး လုပ်လာရော။
ဖန်ဆင်းရှင်အတွေးအခေါ်ဟာ ချောင်းကြည့်တတ်တဲ့သူတစ်ယောက်နဲ့ခပ်ဆင်ဆင်ပဲ။ ခင်ဗျား ရေချိုးနေတုန်းလည်း သော့ပေါက်ကချောင်းကြည့်နေတယ်။ ကိုယ်ပိုင်လုံခြုံမှုမရှိတော့ဘူး။ ခင်ဗျားဘာလုပ်နေသလဲစောင့်ကြည့်နေတယ်။ (ကိုယ်စောင့်နတ်လည်းထိုနည်းလည်းကောင်း) ဒါဟာ အင်မတန် အရုပ်ဆိုးအကျည်းတန်တဲ့ အတွေးပဲ။ ကမ္ဘာမှာရှိတဲ့ ဘာသာတွေမှာ ဖန်ဆင်းရှင်ဟာ ခင်ဗျားကိုစောင့်ကြည့်နေတယ်လို့ပြောတယ်။ အဲဒါဟာ အင်မတန် အကျည်းတန်တာပဲ။ ဘယ်လိုဖန်ဆင်းရှင်ပါလိမ့်။ သူ့မှာ တခြားကိစ္စမရှိတော့ဘူးလား။ လူတိုင်းကိုပဲစောင့်ကြည့်နေတော့တာလား။ ဒါဆိုရင်တော့ သူဟာ အဆင့်အမြင့်ဆုံး စုံထောက်ကြီးပုံပေါက်နေပြီ။
လူ့အဖွဲ့အစည်းဟာ မြေဆီသစ်လိုနေတယ်။ လွတ်လပ်ခြင်းမြေဆီ။ ဘိုဟီးမီးယန်းလို နေထိုင်တာက ဆန့်ကျင်တုန့်ပြန်မှုပဲ။ လိုအပ်လို့တုန့်ပြန်လိုက်တာမျိုးပဲ။ ဒါပေမယ့် ကျုပ်အထင်မှန်ခဲ့ရင် နောက်နောင် ဘိုဟီးမီးယန်းဆန်ခြင်းမရှိလောက်တော့ဘူး။ ဘာလို့လဲဆိုရင် လူတွေကို လိုက်ပြီး ထိန်းချုပ်ချင်နေတဲ့ အများယုံကြည်လက်ခံတဲ့ ဝိဝါဒတွေ နောက်ဆိုရှိမှာမဟုတ်တော့ဘူး။ အဲဒါဆို လူတိုင်း ကိုယ့်ဟာကိုယ် အေးဆေးနေလို့ရပြီ။ ခင်ဗျား လူများကိုတော့ အနှောင့်အယှက်ပေးလို့မရဘူး။ ခင်ဗျားဘဝမှာတော့ ခင်ဗျားစိတ်ကြိုက်နည်းနဲ့ ရှင်သန်နိုင်ပြီ။
အဲဒီတော့မှ တီထွင်ဖန်တီးမှုကရောက်လာမှာ။ တီထွင်ဖန်တီးမှုဆိုတာ တစ်သီးပုဂ္ဂလ လွတ်လပ်ခွင့်ရဲ့ မွှေးရနံ့ပဲလေ။
Creativity - OSHO
Translation.
Regards,
Z
စိတ်ပြေလက်ပျောက်ဘာသာပြန်နေတာပါ။ တတ်နိုင်သမျှကြိုးစားပြီး တစ်အုပ်လုံးပြန်မယ်လို့ စိတ်ကူးပါတယ်။ ညဘက်ဆို ဇနီးသည်က အစောကြီးအိပ်တဲ့အတွက် ၁၁ နာရီဆို အိပ်ခန်းမှာ မီးပိတ်ရပါတယ်။ အပြင်ထွက်ပြီး စာရေးတာကိုလည်း တံခါးဖွင့်လိုက်ပိတ်လိုက်အသံမြည်လို့ သိပ်မနှစ်မြို့ပါဘူး။ ဖြည်းဖြည်းပိတ်လည်း သူနိုးပါတယ်။ အဲဒီတော့ စာရှည်ရှည်ရေးဖို့ အချိန်ရှိသော်လည်း မီးမရှိတာကြောင့် စာအုပ်ကြည့်ပြီး ဘာသာပြန်လုပ်ငန်းမတွင်ကျယ်လှပါ။ စာကြည့်မီးနဲ့လည်း ဖတ်ရတာ အဆင်မပြေဘူးဖြစ်တယ်။ အားလပ်ရက်တွေမှာလည်း ကလေးထိန်းနည်းဖတ်နေတာနဲ့မအားတော့ဘူး။ ကလေးယူတာ၊မယူတာအသာထား၊ နေ့ကလေးထိန်းကျောင်းဖွင့်စားလို့ရတယ်။
Peace B with U.
