တစ်ခါတစ်လေ ထုံးဟာ ရွှေထက် တန်ဖိုးကြီးတယ်။
အမြတ်တနိုးတန်ဖိုးထားရတဲ့ ရေသံလက်စွပ်လေးတစ်ကွင်းဟာ စိန်လက်စွပ် ဆယ်ကွင်းထက်လည်း တန်ဖိုးကြီးတယ်။ အမြတ်တနိုးကောက်ထားတဲ့ ခရေပန်းလေးသုံးပွင့်ဟာ ဈေးကြီးပေးဝယ်ရတဲ့ သစ်ခွတွေထက် တန်ဖိုးအများကြီးပိုရှိတာပေါ့။ .................... ပိုက်ဆံမရှိတဲ့သူတစ်ယောက်က ပိုက်ဆံရှိတဲ့ချစ်သူကို ဘာပေးနိုင်မှာလဲ။ ရုပ်ဝတ္ထုအားဖြင့် ဘာမှမပေးနိုင်ဘူး။ ချစ်ခြင်းမေတ္တာအားဖြင့် ခေါက်ပေးတဲ့ ကြိုးကြာရုပ်လေးဖြစ်ဖြစ်၊ စက္ကူကြယ်လေးဖြစ်ဖြစ် ဒီလောက်တော့ပေးနိုင်မှာပေါ့။ ဒါတွေဟာ တန်ဖိုးထားရင် တန်ဖိုးရှိတာပေါ့။ တန်ဖိုးမထားရင်တော့ အမှိုက်ပေါ့။ ရုပ်ဝတ္ထုပစ္စည်းတွေဟာ လေးနက်မှုတရွေးသားမှမရှိဘူး။ တန်ဖိုးကြီးချင်ကြီးမယ်။ စိတ်ထဲမှာ အလေးအနက်ခံစားထားတာမဟုတ်ဘူး။ တန်ဖိုးအစစ်ဟာ စိတ်ရဲ့လေးနက်မှုဆီကပဲလာတယ်။ ပေါ်ပင်မဆန်ဘူး။ ရွှေချလိုက်တဲ့ စေတီဟာ ထုံးစေတီထက် ပိုပြီး သပ္ပါယ်မသွားပါဘူး။ ရိုးဂုဏ်ဟာ သိပ်လှတာပေါ့။ ဟန်မဆောင်တဲ့ ရိုးရှင်းမှုဟာ မြတ်နိုးတန်ဖိုးထားစရာကောင်းတာပါပဲ။
၁၉၀၁ က စင်ကာပူမှာ ကျင်လည်ခဲ့တဲ့ မြွေအလမ္မာယ်ဆရာတွေ။ မြွေဟာ မြွေဆရာထားတဲ့နေရာနေရတာပဲ။ သူ့မှာစိတ်ရှိပေမယ့်သူဟာ အကျဉ်းသားပဲ။ စွဲလန်းမှုဟာ အကျဉ်းသားဖြစ်စေတာပဲ။ ချစ်ခြင်းတရားမှာ စွဲလန်းမှုကပ်ငြိသွားရင် သမုဒယဖြစ်လာတာပဲ။ မေတ္တာရဲ့ အေးချမ်းမှုကို သမုဒယရဲ့ ပူလောင်မှုက ရှို့မြှိုက်လိုက်တာပါပဲ။ အကျဉ်းကျသွားတဲ့ မြွေလို၊ အသုံးတော်ခံရတဲ့မြွေလို စွဲလန်းမှုဟာ အကျဉ်းကျသွားစေတယ်။ လူတစ်ယောက်ရဲ့ဘဝမှာ အချစ်ကြောင့် ဒုက္ခအင်မတန်ရောက်သွားနိုင်တယ်။ မေတ္တာနဲ့ချစ်လို့တော့ဘာမှမဖြစ်ဘူး။ သမုဒယရဲ့စွဲလန်းမှု၊ ဥပါဒါန်ရဲ့ အထင်မှားကို ဆုပ်ကိုင်စွဲမြဲထားမှုဟာ ပြဿနာတွေရဲ့ အရင်းခံပဲ။ ကံကော်ရွက်နုလေးလို လှတဲ့ လူငယ်ဘဝရဲ့အချစ်ဟာ မိုက်ရူးရဲဆန်လွန်းတယ်။ အသက်ကြီးလာတော့ပြန်တွေးရင်တော့ မိုက်မဲတာတွေလို့ဆိုကောင်းဆိုနိုင်မယ်။ သူ့အရွယ်နဲ့သူပဲ။ အလင်းအတွက်ကြွေဆင်းနေတဲ့ ဥက္ကာခဲလို အလင်းအတွက်ပဲ လောင်မြှိုက်သေဆုံးရတာပါပဲ။
အသက်ကြီးလာလေ ပိုက်ဆံတွေဟာ တန်ဖိုးမရှိလေပါပဲ။ လွန်ခဲ့တဲ့ ၁၂ နှစ်လောက် ဇနီးသည်ဝယ်ပေးထားတဲ့ ကော်ဖီခွက်ကလေးကအစ၊ ပိုင်ဆိုင်ခဲ့တဲ့ ကော်ဖီခွက်တိုင်းမှာ သူ့သမိုင်းနဲ့သူရှိတယ်။ Totoro ခွက်က အခုလက်ရှိခွက်ကလေး။ ကော်ဖီခွက်လေးတွေဟာ ချစ်တဲ့ခင်တဲ့သူတွေကို အမြဲသတိရနေတဲ့စိတ်ထဲမှာ အမြဲတမ်း အိပ်မငိုက်တဲ့ မီးပြတိုက်လေးတွေပဲ။ မေတ္တာတရားဟာ ငွေကြေးလိုလူတကာကို ဖောဖောသီသီဝေနိုင်တာမဟုတ်ဘူး။ ကိုယ်တကယ်ချစ်တဲ့သူအတွက်ပဲပေးတဲ့ အလေးအနက်လက်ဆောင်တွေ။ ဒီလက်ဆောင်တွေအားလုံးမှာ တန်ဖိုးမဖြတ်နိုင်တဲ့ sentimental value တွေရှိတယ်။ လောကကြီးဟာ သိပ်ရှုပ်ထွေးတဲ့နေရာမဟုတ်ဘူး။ အလွယ်ဆုံးနည်းက ကိုယ့်ကိုချစ်တဲ့သူကိုပဲချစ်။ ကျန်တာတွေ အပိုလျှောက်မလုပ်နဲ့။ သူစိမ်းတွေဟာ သူစိမ်းတွေပဲ။ လူတစ်ယောက်နဲ့တစ်ယောက်ချစ်တယ်လို့ထင်မိတာလည်းရှိနိုင်တယ်။ အတုအယောင်တွေများလွန်းတဲ့လောကမှာ ထင်ယောင်မှားမှုတွေနဲ့ အတုအယောင်တွေကို အစစ်ထင်ပြီး ချစ်ခင်မိရင် ကိုယ့်ဒုက္ခကိုယ်ရှာသလိုဖြစ်ရတာပဲ။ လေးနက်တဲ့မေတ္တာတရားကို ငွေကြေးတန်ဖိုးဘယ်လောက်ရှိမလဲစဉ်းစားလို့မရဘူး။ လောကမှာ ငွေဟာ နံပါတ်တစ်မဟုတ်ဘူးလို့ယုံကြည်တဲ့သူဟာ သူယုံကြည်တဲ့အတိုင်းသူသွားမှာပဲ။ ငွေစကားပြောတဲ့ လျှာဖျားတွေဟာ ပျင်းရိစရာတေးသွားတွေလို ဘဝကို ခြောက်သွေ့သွားစေတယ်။ အဲဒီလိုလူတွေဆိုလည်း ဝေးဝေးကသာရှောင်သွားသင့်တယ်။ လောကမှာ အသုံးမကျဆုံးလူဟာ ကိုယ်ချစ်တဲ့သူကို အချိန်မပေးနိုင်တဲ့သူပဲ။ အဲဒါ အရှင်းဆုံး စည်းမျဉ်းပဲ။
tcc က ဆူမာတြား ကော်ဖီ။ ၈ကျပ်ပြား၆၀။ ရိုးရှင်းတဲ့အရသာနဲ့ လေးနက်တဲ့ခါးသက်မှုရှိတယ်။ လတ်ဆတ်တဲ့ကော်ဖီရနံ့ဟာ ရေမွှေးနံ့လိုတော့ မမွှေးလှဘူးပေါ့။ နွေးထွေးပြီး လတ်ဆတ်မှုကို သိသာစေတဲ့ ကော်ဖီရနံ့တော့ရှိတယ်။ ရေမွှေးရနံ့တွေထုံအီသွားရင် ကော်ဖီစေ့ကိုရှုကြတယ်။ ဒါမှ ရနံ့သစ်ကို တစ်ကပြန်စပြီး အာရုံပြုလို့ရမှာပဲ။ ကော်ဖီတစ်ခွက်ရဲ့ အရေးပါမှုဟာ ချစ်ခင်မှုရဲ့ဘာသာစကားတစ်ခုပဲ။ လက်ဖက်ရည်ကြိုက်တဲ့ကောင်မလေးတစ်ယောက် ခင်ဗျားမှာရှိရင် ခင်ဗျားဟာ လက်ဖက်ရည်သောက်သူဖြစ်လာနိုင်တာပါပဲ။ တိကျတဲ့ ဆုံးဖြတ်ချက်နဲ့ ရှေးဘုရားတစ်ဆူဆူဆီမှာ ဗျာဒိတ်မယူထားမိပေမယ့် ချစ်တဲ့ခင်တဲ့သူတွေနဲ့ကြုံရင်ကြုံသလို ကော်ဖီသောက်ဖို့တော့စဉ်းစားထားတယ်။ ဘယ်လောက်ပဲအလုပ်များများ တစ်ရက်တစ်လေတော့ ကော်ဖီအတူသောက်တယ်။ ရယ်စရာမောစရာပြောတယ်။ လူ့ဘဝဟာ ဆူးတွေမဟုတ်ပါဘူး။ ဆူးလှည်းတွေရှောင်လိုက်ရင် လှပတဲ့ ပန်းဥယျာဉ်လည်းရှိပါသေးတယ်။ အမှိုက်လိုလူတွေကိုရှင်းထားလိုက်ရင် သန့်စင်တဲ့ပတ်ဝန်းကျင်မှာ လေကောင်းလေသန့်ရှူရင်း ကြည်လင်နိုင်ပါသေးတယ်။ ကိုယ့်ဘဝမှာ ကိုယ်နေတာ ဘယ်သူ့မှ ယောင်ပြီး အားမနာလိုက်လေနဲ့။ လူဟာ ကိုယ့်သမိုင်းပဲကိုယ်ရေးကြတာ။ အပိုအလုပ်တွေ များများလုပ်ရင် ကိစ္စများတာပဲ။ ကိုယ့်ဘဝကိုယ် စိတ်ကြိုက်တည်ဆောက်တာမကောင်းဘူးလား။ လောင်းရိပ်မှာ လုံလုံခြုံခြုံ ကြုံကြုံလှီလှီပွင့်တာထက် နေရောင်အောက်မှာ ရဲရဲပွင့်လိုက်တာ ပိုလွတ်ငြိမ်းတာပေါ့။ အိုမာခိုက်ယမ်ကြီးရဲ့သစ်ကိုင်းမလိုပါဘူး။ စားပွဲခုံလေးတစ်ခုနဲ့ ကော်ဖီနှစ်ခွက်၊ ချစ်သူရှိရင် ပြည့်စုံပါပြီ။ ချစ်သူမရှိလည်း ကော်ဖီနှစ်ခွက်ကို ခင်ဗျားတစ်ယောက်တည်း ဝဝလင်လင်သောက်နိုင်တာလည်း ကျေနပ်စရာအတိပဲ။
ငရုပ်သီးပင်ရဲ့ အလှအပဟာ အပင်မှာ သီးနေတုန်းပဲလှရှာတာ။ အတောင့်နှစ်ဆယ်ကို ပြားနှစ်ဆယ်လောက်ပဲရှိတဲ့ ငရုပ်သီးတစ်ပင်ကို ငါးကျပ်ပေးဝယ်ထားတာဟာ ချစ်ခြင်းတရားရဲ့ ဘက်လိုက်မှုတစ်မျိုးပဲ။ လူဟာ ရွေးချယ်စရာကြုံလာတဲ့အခါ ကိုယ်တန်ဖိုးထားတာကို ရွေးချယ်တယ်။ ကာကွယ်စရာလိုလာရင် ကိုယ်တန်ဖိုးထားတာကို ကာကွယ်တယ်။ ကိုယ်ကြိုက်တာ ကိုယ်ကာကွယ်တာဟာ လူတိုင်းရဲ့ ကိုယ်ပိုင်အခွင့်အရေးပါပဲ။ ဟင်းချက်စားဖို့မရည်ရွယ်တဲ့ ငရုပ်သီးပင်လေးကို ကြည့်နေချင်တဲ့သူနဲ့ ငရုပ်သီးကို စားစရာလို့မြင်တဲ့သူတွေဟာ မိတ်ကောင်းဆွေမွန်ဖြစ်ဖို့ခက်တယ်။ ငရုပ်သီးမှာလည်း အလှတရားရှိတယ်။ သူ့ရဲ့အလှတရားဟာ သူ့ရဲ့အသုံးဝင်မှုနဲ့မဆိုင်ဘူး။ အသုံးဝင်မှပဲချစ်မယ်၊ခင်မယ်ဆိုရင်တော့ ကျွန်တော်တို့ဟာ အင်မတန်ကျဉ်းမြောင်းတဲ့စိတ်ထားနဲ့လူဖြစ်ကုန်မှာပဲ။ ချစ်ခြင်းတရားဟာ ယုတ္တိယုတ္တာနဲ့ဆင်းသက်တာမဟုတ်သလို၊ ဆင်ခြင်ဆုံးဖြတ်မှုနဲ့အမှတ်ပေးတာလည်းမဟုတ်တဲ့အတွက် အလွန်လှတဲ့စိတ်ရဲ့ ပကတိတုန့်ပြန်မှု ရစ်သမ်တစ်ခုလို့ပဲဆိုနိုင်တယ်။ ပြန်ယူလို့ရတဲ့အရာဟာ မေတ္တာအတုပဲ။ အစစ်က ပြန်ယူလို့လည်းမရဘူး။ ပေးလို့လည်းမကုန်သွားဘူး။ စိမ်းစိုလှပတဲ့ ငရုပ်သီးပင်လေးဟာ ဒီမေတ္တာတရားဒဿနစိုစွတ်စိမ်းလန်းနေတာပဲ။
ကျိုက်ထီးရိုးသုံးခါတက်တော့ ဘေးနားကလူနှစ်ယောက်ပြောင်းသွားတယ်။ထပ်တော့မပြောင်းတော့ပါဘူး။ ပြီးခဲ့တာတွေပြီးပါစေတော့။ နောက်ဆုံးလူကို အချစ်ဆုံး။ ကာရံမဲ့ချင်မဲ့ အဘိဓမ္မာမမဲ့စေနဲ့ဆိုတဲ့စကားဟာ ဒီနေရာဆီလျော်တယ်။ ဒီပုံလေးကို လူတွေတိုးကြိတ်နေတဲ့ကြားက sketch လေးဆွဲဖြစ်တယ်။ အရင်ကလှူခဲ့တဲ့ခေါင်းလောင်းတွေဖြုတ်ပစ်လိုက်လို့ စိတ်သက်သာရာရတယ်။ သံသရာမှာလည်း ပြန်မဆုံချင်တော့ဘူး။ အတူလှူထားဖူးတဲ့ အလှူဖြတ်ပိုင်းအခုတစ်ရာလောက်ကို မီးတော်တော်ရှို့ယူရတယ်။ ကလေးတွေဆင်ခြင်ကြ။ နောင်အခါ လမ်းခွဲရနိုင်တဲ့သူတွေနဲ့ ဘာမှ အမှတ်တရမလုပ်မိစေနဲ့။ ဘုရားရင်ပြင်တော်မှာလမ်းလျှောက်ရင်း အောင်မြေလိုက်ရှာတာမတွေ့ဘူး။ အဲဒါကို သူငယ်ချင်းတစ်ယောက်ကပြောတယ်။ ငါတို့တွေ ဒီလောက်ပတ်လျှောက်နေတာ အောင်မြေတော့နင်းပြီးရောပေါ့တဲ့။ အမှန်ပဲ။ လူဟာ ကိုယ့်ဟာကိုယ် ကျေကျေနပ်နပ်လေးဖြေတွေးနိုင်ရင် အင်မတန်နေပျော်တယ်။ အတိတ်ကို အတိတ်မှာ၊ ပုလိပ်ကို ဂိတ်မှာ ထားခဲ့ရင်ကောင်းတယ်။
ပြိုင်မောင်းလို့ရချင်မှရမယ်။ အမှတ်တရတော့ဖြစ်ရတာပါပဲ။ ဆုံရပ်ဟိုတယ်မှာ စုံရပ်နေတဲ့ ကားတစ်စီးရှိခဲ့တယ်။ ဒီကားဟာလည်း sentimental value ရှိကောင်းရှိနေနိုင်တယ်။
ဖြတ်သန်းမှုတွေဟာ ရပ်တန့်မှုတစ်ခုဆီကို ခရီးနှင်တာပါပဲ။ ချစ်သည်ဖြစ်စေ၊မုန်းသည်ဖြစ်စေ၊ မချစ်မမုန်းသည်ဖြစ်စေ၊ လူဟာ ရှင်ကွဲ၊သေကွဲတစ်ခုခုကွဲကွာဦးမှာပါပဲ။ တစ်ချို့စက္ကန့်တွေက နှစ်ခါပြန်မရနိုင်တော့ဘူး။ ဟေရာကလိုက်တပ်စ်ဟာ မြစ်တစ်ခုမှာနှစ်ခါခုန်မချနိုင်ဘူးလို့ပြောခဲ့သလို၊မမျှော်လင့်ထားတဲ့သူဟာ မမျှော်လင့်ဘဲဖြစ်လာတယ်ဆိုတာမျိုးမဖြစ်နိုင်ဘူးလို့လည်းပြောခဲ့သေးတယ်။ ဘဝကိုသိပ်အများကြီးမမျှော်လင့်ထားဘဲ မြစ်တစ်မြစ်ထဲကို တစ်ခါတည်းပျော်ပျော်ရွှင်ရွှင်ခုန်ချလိုက်တာဟာ အလုပ်လည်းနည်းသလို အတန်အသင့်စွန့်စားခန်းဆန်တာပါပဲ။ ကိုယ်ခြေမကိုခဲနေတဲ့ပုရွက်ဆိတ်သွားဟာ သူများမျက်လုံးကိုထုတ်ချင်းခတ်တဲ့မြားထက်တော့နာနေတာပဲ။ မတတ်နိုင်ဘူး။ သူ့ထိုက်နဲ့သူ့ကံပဲ။
Regards,
Z
Peace B with U.
