မာယာမပါသော ပန်းပွင့်များအကြောင်း

မာယာမပါသော ပန်းပွင့်များအကြောင်း

နေသာနေသောကြောင့် ရင်ခုန်သံများ အလင်းပြန်ကြသည်။

ရေကန်တစ်ကန်၊ ကြာတစ်ပွင့်၊ ကောင်းကင်တစ်ခု ... စသည့် နိမိတ်ပုံများဖြေလျော့ထားသော ... အတွင်းစိတ် ....အနက်အရှိုင်းအထိ တိုးဝင်ချဉ်းနင်းလာသော သတိရမှုများသည် နာကျင်သော အရောင်ရှိလိမ့်မည်။ ၀င်သက်နှင့်ထွက်သက်ကြားရှိ ကာလငယ်လေးတစ်ခုစာ စဉ်ဆက်မပြတ်သေဆုံးနေရသော ဒဏ်ရာသည် အနီရောင် လက်ဖြာရှင်းသန့်နေလိမ့်မည်။ သတိရမှုများဖြင့် ခဲရာခဲဆစ်တွယ်ဆက်ထားသော အဖြူရောင်ကြိုးများကို တန်ခိုးရှင်တစ်ပါးပါး ကူညီဖြည်လွှတ်ပေးရန်မလိုအပ်ပါ။ စကားလုံးများမပါသော မေတ္တာတရား၏ စိမ့်စမ်းရေများစီးဆင်းရာ ပြာဝင်းလဲ့စင်သော စမ်းချောင်းငယ်သည် ချစ်ခင်သူတို့၏ စိတ်မှ ...မိမိတို့၏ စိတ်သို့ ... ညင်သာစီးဆင်းလာနေမြဲသာ။

ကောင်းကင်နှင့်မြေကြီးသည် သတိရလွမ်းဆွတ်မှုများ၏ အကန့်အသတ်မဖြစ်ခဲ့ပါ။ ကာလနှင့်အကာသကြားရှိ ...ဒြပ်မှုန်များသည် တူညီစွာတုန်ခါနေသောအခါ ... အနီးအဝေးတရားသည် ....လဲပြိုအက်ကွဲခဲ့သည်။ .... ကံတရားဖြင့် မခိုင်မခန့်ချည်နှောင်ထားသော တွေ့ကြုံဆုံကွဲ စာအုပ်ခပ်ပါးပါးလေးတစ်အုပ် .... အမှောင်ထဲ တိုးဝင်လဲကျနေပြန်သည်။ ... ရနံ့ဖျော့မှိုန်နှုန်း မြန်ဆန်လွန်းသော နွေလယ်ပန်းတစ်ပွင့်ဆန်ဆန် .... အရာရာ ပြောင်းလဲခြောက်သွေ့သွားပုံမှာ မြန်ဆန်လွန်းနေသည်။

တိုးတိုးဖွဖွရေရွတ်နေမိသော အမည်နာမများသည် .... စိမ်းလန်းမှုကို ရွက်နုများတပ်ဆင်ပေးနိုင်ပါလိမ့်မည်။ တစ်ဦးတစ်ယောက်၏ စိတ်ထဲတွင် တစ်ဦးတစ်ယောက်က အရိပ်လိုမိုးပေးထားသည်။ ... ထိတွေ့ကိုင်တွယ်၍ မရသော စိတ်သည် ထိတွေ့ကိုင်တွယ်၍ မရသောအတွေးများမှတစ်ဆင့် .... အာရုံများကို လှပဆန်းကျယ်စွာ အရောင်ခြယ်လိုက်သောအခါ ... ကြယ်ကြွေသောညများ၊ ရေနည်းသော ရေအိုင်များ၊ ... ခမ်းခြောက်သွားသော ကော်ဖီခွက်များ၊ ပူပြင်းရှတသော မျက်ရည်များ ....သက်ဝင်ရုန်းကြွလာသည်။ တစ်ခါတစ်ရံမျက်ရည်များသည် စိတ်နှစ်ခုဆီသို့ဖြတ်သန်းသွားလာရန် အတိုဆုံးလမ်းသွယ်လေးတစ်ခုဖြစ်ပါလိမ့်မည်။ ...

ပြောင်းလဲခြင်းတရားများတိတ်တဆိတ် လျောတိုက်ထွက်ခွာသွားသည် ....။

ဘုရားမဖန်ဆင်းမီက ကမ္ဘာတစ်ခုလို ....

အဆင့်အဆင့်ဖြစ်ပေါ်တိုးတက်လာခွင့်ကို စွန့်လွှတ်လိုက်သည့် ပရိုင်းမိတ် ခပ်ပျင်းပျင်းတစ်ကောင်လို ....

စိတ်စဉ်မမီသောစိတ်တစ်ခု ဒရွတ်တိုက်မျောလွင့်ထွက်ခွာလာခဲ့ရသည်။ ရောက်လုပြီလား ..မသေချာ ....။

တစ်ခါတစ်ရံ .... ဟဒယ၀တ္ထုမှ သွေးစက်လေးကို ဖယ်ထုတ်လိုက်ချင်သည်။

ထပ်မံတွေးမနေနိုင်လောက်အောင် သွေးအေးသတ္တ၀ါ ဖြစ်ချင်သည်။

လောကနှင့် အလိုက်သင့်အလျားသင့်ကူးခတ်ခွင့်တစ်ခုသာ ဆုကြီးပန်ခဲ့မိသော ဘ၀ကြီးကို ခပ်ပေပေ ပစ်ချထားရင်း .... ပန်းပွင့်များ ကျိန်စာမိနေသော ဆောင်းရာသီ တစ်ပတ်နွမ်းတစ်ခုစာ မောပမ်းနွမ်းနယ်လာသည်။ ဒုလ္လဘတရားဖြင့် ပိတ်မိနေသော နယ်ကျွံပွန်းတစ်ကောင်သည် သူရဲကောင်းဆန်မနေနိုင်တော့သည်မှာ သဘာဝအကျဆုံး ဇာတ်ဝင်ခန်းတစ်ခုဖြစ်နိုင်သေးသည်။

ကံတရားရေစီးနှင့်မျောနေသည့် ငါးတစ်ကောင်ကို x ဟုထားပါ။

ကျွန်တော်တို့အားလုံး အိမ်ပြန်ချိန် အိမ်မက်လေးတစ်ခုဖြင့်သာချိတ်မိထား x များဖြစ်နေပါလိမ့်မည်။

ကြားနေကြသတင်းများအရ .... ယမန်နေ့နှင့် အလားတူနေ့များတွင် ပန်းများမပွင့်ကြတော့ပါ။            ။

ခင်မင်စွာဖြင့်

Zephyr

Notes:

။။။။။။။။။။။။။။။။။။။။။။။။။။။။။။။။။။။။။။။။။။။။။။။။။။။။။။။။။။။။။။။။။။။။။။။။။။။။။။။။။။။။။။။။။။။။။။။။။။။။။။။

... ရေးချင်တာက တခြားတစ်ခုခုဖြစ်ပါတယ်။ မရေးတတ်တာနဲ့ လမ်းချော်သွားပါတယ်။ (မကြာမီတိမ်းမှောက်သွားမယ်လို့ ယူဆရပါတယ်။  ...)

လက်ဆောင်ရထားတဲ့ စာအုပ်ဆယ်အုပ်ကျော်ကို မြည်းစမ်းနေပါတယ်။ Bottom Billion လည်းဆက်ရေးပါဦးမယ်။ စာအုပ်တွေဝယ်ပေးတဲ့အတွက် အမေ့ကို ကျေးဇူးတင်ပါတယ်။

မလေးရှားမှာ အလ္လာဆိုတဲ့စကားလုံးကို ဘယ်သူပိုင်လဲဆိုတဲ့ မေးခွန်းတစ်ခုနဲ့ အကြမ်းဖက်မှုဖြစ်နေတာကို နားမလည်နိုင်လောက်အောင်ဖြစ်နေပါတယ်။ ဘာသာတရားအဆုံးအမဟာ လူတွေကို သိမ်မွေ့ဖို့ ရည်ရွယ်ထားတယ်လို့ အကြမ်းဖျင်းနားလည်ထားပေမယ့် တစ်ဆိတ်ရှိ ... အကြမ်းဖက်ချင်တာကိုတော့ ဘယ်လိုမှလက်မခံနိုင်ပါဘူး။ မွတ်စလင်နိုင်ငံမှာ ခရစ်ယာန်ဘုရားကျောင်းထဲ မီးလောင်ဗုံးပစ်ထည့်တာပဲဖြစ်ဖြစ် .. ခရစ်ယာန်နိုင်ငံမှာ ဗလီထဲ မီးလောင်ဗုံးပစ်ထည့်တာပဲဖြစ်ဖြစ် .... အကြမ်းဖက်မှုမြောက်တာပါပဲ ....။ ယဉ်ကျေးတဲ့ လူ့ အသိုင်းမှာ မယဉ်ကျေးတဲ့ လူတစ်ချို့အတွက် နေရာရှိနေသေးတာကို လက်မခံပါဘူး။ အသိဥာဏ်နည်းတဲ့ အယူအဆဟာ အားကောင်းမလာဖို့ လူတိုင်းမှာတာဝန်ရှိပါတယ်။ ဘာသာတရားကို ခုတုံးလုပ်ပြီး အကြမ်းဖက်နေတဲ့ လက်တစ်ဆုပ်စာ လူနည်းစုကို One of us ဆိုပြီး ဆိတ်ဆိတ်နေတာမျိုးကတော့ ဘယ်တော့မှ ထောင်တန်လာမှာမဟုတ်ပါဘူး။ အသိဉာဏ် အဆင့်အတန်းရှိတဲ့သူတိုင်းဟာ ကိုယ်ချင်းစာတရားကိုတန်ဖိုးထားပါတယ်။ If I devalue you, I devalue myself . သူ့ဂုဏ်နှိမ့်ရင် ကိုယ့်ဂုဏ်နိမ့်တာပါပဲ။ ...

နောက်တစ်ခုက ... ဒူးရင်းသီး Esplanade မှာကျင်းပတဲ့ ပန်းချီထိန်လင်းရဲ့ The Scale of Justice အကြောင်းပါ ...။ (မြန်မာပြည်လည်း ပြန်မယ်လို့ စိတ်ကူးရှိသေးတဲ့အတွက် ... အကြမ်းဖျင်းပဲရေးလိုက်ပါတယ်။ ဖြည့်စွက်ပြီးသာ နားလည်လိုက်ပါ။) အခုပြပွဲမှာတော့ ပန်းချီထိန်လင်းဟာ ဆေးရုံသုံးလက်အိတ်တွေကို installation လုပ်ထားပါတယ်။

ခုနစ်ပေမြင့်တဲ့ လေးတိုင်စင်ပေါ်မှာ လက်အိတ်အမည်းတွေက ချိန်ခွင်ကို အုပ်မိုးထားပါတယ်။

ဆိုလိုတာကတော့ တရားမျှတမှုကို လက်အိတ်အမည်းတွေက အုပ်စိုးထားတယ်လို့ယူဆရပါတယ်။ လက်တွေမည်းနေတာကြောင့် အာဖရိကမှာ ဖြစ်နိုင်ပါတယ်။ (:P) .... ချိန်ခွင်က လျှာထွက်နေတဲ့အတွက် တစ်ခြမ်းစောင်းနေပါတယ်။ ရောင်းသူဝယ်သူအသံမတူနိုင်တဲ့ သမာဓိချိန်ခွင်လို ညီညီလေးမဟုတ်ပါဘူး။ ဆိုလိုတာကတော့ အမည်းတွေကြောင့် ချိန်ခွင်လည်းမတည့်တော့ဘူး။ ငါးရောင်းလို့မရလောက်အောင် သမာဓိချိန်ခွင်က ရွဲ့နေပြီလို့ဆိုလိုပါတယ်။ အာဖရိကမှာလည်း ဒါမျိုးတွေရှိသေးတာပဲလို့ယူဆပါတယ်။ ...

အောက်မှာတော့ အုတ်လမ်းလေးရှိပါတယ်။ ထောင်နှုတ်ခမ်းလမ်းလျှောက်ဆိုတာကို သရုပ်ဖော်တဲ့အနေနဲ့ Burma ဆိုတဲ့ ဘယ်ကမှန်းမသိတဲ့ တိုင်းပြည်လေးတစ်ခုက ထောင်နံရံဖြူဖြူတွေကို အုတ်ခဲအဖြူတွေနဲ့ နိမိတ်ပုံသုံးထားပါတယ်။ အောက်မှာတော့ ဆေးရုံသုံးလက်အိတ်လေးတွေ လေမှုတ်ထားတဲ့အတွက် ... လက်၀၀လေးတွေက တစ်ခုခုကို တောင်းဆိုနေသလို မျှော်လင့်နေသလို ...အဲဒီလိုပက်လက်လဲနေပါတယ်။ ... လက်၀၀လေးတွေက ခပ်ဖြူဖြူလေးတွေဖြစ်တဲ့အတွက် တရုတ်ပြည်ကလူတွေဖြစ်နိုင်ပါတယ်။ သိတဲ့အတိုင်း တရုတ်ပြည်မှာက မမျှတဘူးမဟုတ်လား။ ဆန္ဒပြလို့ တင့်ကားနဲ့ကြိတ်သတ်လိုက်တာ အဲဒီတရုတ်ပြည်ပေါ့ ....။

အဲဒီလို လေမှုတ်ထားတဲ့ လက်၀၀လေးတွေက မြန်မာပြည်သားတွေမှုတ်ထားတဲ့လေတွေပါတဲ့။ Volunteers သွားလုပ်တဲ့ကလေးတွေမှုတ်ထားတာပါ။ ဘုရားသခင်က အာဒံကို အပ်ချလောင်းလို့ မဖန်ဆင်းပဲ ..အသက်ဓာတ်ကိုမှုတ်သွင်းတော်မူသည်ဆိုတဲ့ ကမ္ဘာဦးကျမ်း .. Genesis ထဲကအတိုင်းပေါ့လေ... အခုလည်း လူတွေ ...အထူးသဖြင့် ... အေးအေးချမ်းချမ်း နဲ့ ရိုးသားလွတ်လပ်မျှတမှုကို တောင်းဆိုတဲ့အေးချမ်းတဲ့ သရုပ်သကန်ပေါ်လွင်ဖို့ ...မြန်မာလေစစ်စစ်ကို ရေမရောမှုတ်သွင်းထားတာလို့သိရပါတယ်။ ကြားတာပေါ့နော် ...။ အဲဒီလိုကြားခဲ့တယ်ပေါ့နော် ...။ မြန်မာလူမျိုးတွေရဲ့ စရိုက်ကလည်း ရိုးသားမျှတ အေးချမ်းတာကို သဘောကျပါတယ်။ အကြမ်းဖက်တာကိုမကြိုက်ပါဘူး။ အဲဒါလေးကို အေးအေးချမ်းချမ်းသရုပ်ဖော်တယ်လို့ယူဆပါတယ်။ ယူဆတယ်ဆိုတာက တကယ်မသိလို့ ယူပြီးဆကြည့်တဲ့သဘောပါ ..။ဒူးရင်းသီးဝယ်ခါနီးလည်း ယူပြီးဆကြည့်ရသလိုပေါ့လေ ...။ တကယ်သိရင်တော့ အဲဒီလိုအဓိပ္ပာယ်ရတယ်လို့ ဟော၂ဒိုင်း၂ ပြောလိုက်မှာပါ ။ အခုတော့ ယူဆမိပါတယ်လို့ပဲရေးပါတယ်။

နောက်တစ်ခုက အဲဒီ installation က process သဘောလည်းပါတယ်လို့ကြားရပါတယ်။ ခဏခဏကြားရတယ်ဆိုတော့ အဲဒီကလူတွေက စကားအကျယ်ကြီးပြောကြတယ်လို့သာမှတ်ပါ။ ... လက်တွေက လေတွေဟာ လျော့လာတယ် ... လက်၀၀ကြီးတွေက ပိန်လှီဖျော့တော့လာတယ်။ အဲဒါက ဖြစ်စဉ်ပဲ ..။မမြဲဘူး ...။ တရားဖြစ်စေ ..ပုဆိုးဖြစ်စေ ...မြဲတယ်ခိုင်တယ်ဆိုတာ အထင်သက်သက်ပဲ ....။ တောင်းဆိုတဲ့ လက်တွေလည်း ပျော့သွားမယ်။ ပိုင်ဆိုင်တဲ့လက်တွေလည်း လျော့သွားမယ် ....။ သမိုင်းတလျှောက်လုံးကြည့်ရင် (မိုးတွင်းဆိုရင် သမိုင်းတလျှောက်လုံး ကားတွေရေနစ်နေတယ်) ... စနစ်တွေပြောင်းပြောင်းသွားတယ် ...။ မပြောင်းတာကတော့ အုပ်ချုပ်သူလူတန်းစားနဲ့ အုပ်ချုပ်ခံလူတန်းစားပါပဲ ...။ အုပ်ချုပ်ဖို့ မလိုအပ်တဲ့နေ့မှာ ဒီစနစ်တွေကလည်း ထပ်ပြင်ရပြောင်းရဦးမှာပဲ ....။ ၀မ်းရောဂါ ကမ္ဘာမှာမရှိတော့ဘူးဆိုရင် ကာကွယ်ဆေးထုတ်လုပ်ဖို့သေရေးရှင်ရေးလုပ်နေစရာ ...မလွှဲသာမရှောင်သာလုပ်နေစရာမလိုတော့သလိုပေါ့ ...။

.... အဲဒီပြကွက်လေးက ရိုးရိုးလေးပါပဲ ...။ဓာတ်ပုံလေးဘာလေးရိုက်ခဲ့မလို့ ...  တစ်ချို့လက်၀၀ကြီးတွေက မြင်ဖူးသလိုဖြစ်နေတာနဲ့မရိုက်ခဲ့လိုက်တော့ဘူး။

နောက်တစ်ခုက အမေရိကန်က ငနဲတစ်ယောက်ပါ။ ငနဲလို့ပြောလို့ သူက အနုပညာရှင်မဟုတ်ဘူးလို့မမှတ်ပါနဲ့။ သူက သေဒဏ်ပေးခံရတဲ့သူတွေနောက်ဆုံးတောင်းဆိုတာတွေကို ပုံလေးတွေနဲ့တွဲပြီးပြပါတယ်။ သေခါနီး သကြားလုံးအများကြီးစားသွားတဲ့သူတွေ။ သံလွင်စေ့ တစ်စေ့တောင်းတဲ့သူတွေ၊ World Peace ကို Last Meal အနေနဲ့တောင်းသွားတဲ့ လူမည်းလေးတစ်ယောက် ... စိတ်ဝင်စားဖို့ကောင်းပါတယ်။ သေခါနီးမှာ အစာလေးတောင်းဖို့ ခွင့်ပေးထားတာဟာ သူ installation လုပ်ဖို့လိုဖြစ်နေပါတယ်။ သေခါနီးမှာ စားသွားတဲ့ဟာတွေကို ကြည့်ရင်း ဘ၀မှာ အတင်းအကြပ် ရွေးချယ်ခိုင်းနေတဲ့ အခြေအနေတွေအကြောင်းကို သတိရစေပါတယ်။ ဒူးရင်းသီးကနေ MRT ကို သွားတဲ့လမ်းမှာပြထားပါတယ်။ သွားကြည့်လိုက်ပါ။

ဤ တွင် သတင်းများကို ကြေညာလို့ပြီးပါပြီ။

Peace B with U.