ဖုန်းနံပတ်မှတ်နည်း
အချိန်ကာလဟာ လူတွေကိုပြောင်းလဲစေတယ်။
ဘဝဟာ ပြောင်းလဲနေတယ်။ ကျနော်တို့ဟာ ပြောင်းလဲနေကြတယ်။
လူငယ်တစ်ယောက်ကနေ လူလတ် တစ်ယောက်ဖြစ်လာပြီး၊ အခု လူကြီးတစ်ယောက်ဖြစ်လာခဲ့ပြီ။
ဘယ်အရာတွေကို ထားခဲ့မလဲ၊ ဘယ်အရာတွေကို ဆက်လက်သယ်ဆောင်သွားမလဲ။
ကျနော်စဉ်းစားမိတယ်။
ကျနော် စတင်ခဲ့တယ်။
ကျနော် အဆုံးသတ်ခဲ့တယ်။
ချစ်ခြင်းတရားကိုလည်း နားလည်လာခဲ့သလို၊
သားပေါက်စလေးလည်း အခု ရှစ်နှစ်ပြည့်သွားခဲ့ပြီ။
သားက ကျောင်းမှာ သူငယ်ချင်း ဖုန်းနံပတ်မှတ်ဖို့ ဖုန်းမပါသွားလို့ မမှတ်ခဲ့ရဘူးလို့ပြောတယ်။
ဖုန်းနံပတ်ကို စာအုပ်မှာ ချရေးထားလို့ရမှန်း သူမသိသေးဘူး။
ကျောင်းမှာ ဒုတိယတန်း စတက်တယ်။
ကျောင်းမှာ ပူပြီး အခန်းက ဖုန်စော်နည်းနည်းနံနေတယ်လို့ပြောတယ်။
ကမ္ဘာကြီးကို သူ ဘယ်လိုမြင်လာလဲ မသိသေးဘူး။
ကျနော်တို့ထွက်ခွာသွားမယ့် ကမ္ဘာကြီးနဲ့ သူဝင်ရောက်သွားရမယ့် ကမ္ဘာကြီးဟာ အတူတူပဲ။
ကျနော်တို့ဟာ ကောင်းမွန်တဲ့ လူ့အသိုင်းအဝိုင်းတစ်ခုကို တည်ဆောက်ဖို့ တတ်နိုင်သလောက် ကြိုးစားခဲ့ကြတယ်။ ရက်စက်တဲ့ ကမ္ဘာကြိးထဲ သိမ်မွေ့တဲ့ သစ်သီးကို သယ်ဆောင်လာခဲ့မိတယ်။
ဘယ်လိုခရီးလဲ။
ပြိုပျက်နေတဲ့ တိုင်းပြည်ကို ပြန်တည်ဆောက်ရဦးမယ်။
မိသားစုအတွက် ကြိုး ပမ်းခဲ့သလို တနေ့ တိုင်းပြည်အတွက်လည်း အချိန်ပေးရဦးမယ်။
ဒီနေ့တော့ သားရေကူးတာ သွားစောင့်ရင်း သူကြီးပြင်းလာပုံကို တွေးနေမိတယ်။
မြန်မာပြည်အကြောင်းသိပ်မသိတဲ့ ကလေးတစ်ယောက်၊ မြန်မာလိုလည်း မပြောတော့တဲ့ ကလေးတစ်ယောက်အမြင်ကတော့ မြန်မာပြည်မှာအမှိုက်ပုံတွေနဲ့ခြင်ရှိတယ်။ မီးပျက်တယ်။ ရွှေတိဂုံဘုရားရှိတယ် ဆိုတာထက်မပိုဘူး။
မြန်မာပြည်ပြန်သွားတဲ့အခါ သူ့အတွက် ခက်မလား စဉ်းစားမိတယ်။
ဒါပေမယ့် ဒီတိုင်းပြည်အကျိုးအပဲ့လေးက သားတို့ပြန်ဆက်ရမယ့် ဂျစ်ဆောတစ်ခုပဲ။ နိုင်ငံချစ်စိတ်လေးတစ်ခုကိုတော့ သူ့ကို အမွေပေးချင်တယ်။
သိပ်ခက်တာတော့မဟုတ်ပေမယ့် ... သိပ်မလွယ်တဲ့ဘဝတွေအကြောင်း သူ့ကိုပြောပြရတယ်။
မီးပျက်နေတဲ့ညတွေမှာ ဖယောင်းတိုင်နဲ့ စာကျက်ရတဲ့ ကလေးတွေအကြောင်း။
အခြေခံပညာရေးအတွက် ၂ နာရီ လမ်းလျှောက်ပြီး ကျောင်းတက်နေရတဲ့ကလေးတွေအကြောင်း။
ဒါတွေဟာ သူ့အတွက်တော့ ထူးဆန်းနေမှာပဲ။
ချမ်းသာတဲ့နိုင်ငံတွေသွားပြီး ကိုယ်တစ်ယောက်တည်း ချမ်းသာဖို့ကြိုးစားရတာကတော့ မခက်ပါဘူး။
သားကြီးလာတဲ့အခါ မြန်မာလိုကောင်းကောင်းပြောတတ်စေချင်တယ်။ နိုင်ငံချစ်စိတ်လေးလည်း ရှိစေချင်တယ်။ ကိုယ့်လောက် အကျိုးပေးမကောင်းတဲ့ လူတွေအတွက် ကူညီချင်စိတ်လေးလည်းရှိစေချင်တယ်။
ဒါပေမယ့် သူ့ရဲ့ ရွေးချယ်မှုကိုလည်း လေးစားရမှာပါပဲ။
သူတိုးဝင်နေတဲ့လောကက ငါတို့ထွက်သွားရမယ့်လောကပဲ။
ဒါကိုလည်း ပြင်ဆင်ရတယ်။
သူ့ဘဝကို သူတစ်ယောက်တည်း ကောင်းစွာနေထိုင်တတ်တဲ့အထိ ကျန်းကျန်းမာမာနေသွားဖို့ ပြင်ဆင်နေတယ်။
အချိန်တွေ အကုန်မြန်တယ်။
မနှစ်က ဘယ်လိုကုန်သွားလဲမသိလိုက်ဘူး။
၂၀၂၅ မှာတော့အချိန်နည်းနည်းပိုယူပြီး ကျန်းမာအောင်နေမယ်။
AI stocks မှာ ဒေါ်လာ ၂သိန်းထည့်ထားပြီး ငါးနှစ်အကြာ ၅ ဆပွားပြီး ၁ သန်းရအောင်ကြံနေပြီ။
ဒါကြောင့် ဒီ ငါးနှစ်ကို အမြန်ဆုံးကုန်သွားစေချင်တယ်။
အပြောင်းအလဲများတဲ့ ၂၀၂၅။ ၄ နဲ့စားရင်မပြတ်တဲ့နှစ်တွေဟာ ဘာလုပ်လုပ် သတိထားလုပ်ရတယ်။
မစွန့်စားနဲ့၊ ဖြည်းဖြည်းပဲလျှောက်။ ရောက်သွားလိမ့်မယ်။
ခရီးက မဝေးဘူး။ လမ်းတည့်တည့်လျှောက်သွားဖို့ပဲလိုတယ်။
Peace B with U.
