ခုတလောနဲ့ မကြာမတင်နေ့များ။

ခုတလောနဲ့ မကြာမတင်နေ့များ။

ခုတလော ရာသီဥတုမကောင်းသလို၊ ကျန်းမာရေးလည်းမကောင်းဘူး။

အစာအိမ်ကမကောင်းသလို၊ အစာအိမ်ကောင်းလာတော့ ခေါင်းပြန်ကိုက်လာတယ်။ ခေါင်းကိုက်ပျောက်ရင် ဘာရောဂါထပ်ရလာဦးမလဲတောင်လန့်နေရတယ်။

PC show

မှတ်မှတ်ရရ ဒီတစ်ခေါက်အိုင်တီရှိုးမှာ ဘာမှမ၀ယ်ဘဲနေနိုင်လို့ အတော်လေးဝမ်းသာရတယ်။ နေ့လည်ထမင်းစားချိန်မှာ ရုံးကနေ Suntec ကိုသွားကြည့်လိုက်သေးတယ်။ သူငယ်ချင်းတစ်ယောက် broadband လျှောက်တာလိုက်ကူရင်း Starhub မှာလူစည်ကားနေတာတွေ့ရတယ်။ အပြန် ရေပန်းနားက မူတူးဆိုတဲ့ကုလားဆိုင်မှာ စားရင်း ez link ကဒ်ကျန်ခဲ့တာမသိလိုက်ဘူး။ ez link ကဒ်က တစ်လကို ၁၀၀ ၀န်းကျင်ကုန်တတ်တဲ့အတွက် မပျောက်ခင်နှစ်ရက်လောက်ကမှ ၅၀ ထည့်ထားသေးတယ်။ ပျောက်သွားတော့ ကဒ်အသစ်ပြန်ဝယ်ပြီး ရုံးပြန်လာလိုက်ရတယ်။ ပုံမှန်လည်းမကြာမကြာပျောက်တတ်လို့ ကျောပိုးအိတ်ထဲမှာ ကဒ်အပို တစ်ကဒ်၊ နှစ်ကဒ် အမြဲထည့်ထားရတယ်။ အခုပျောက်တာက အမြဲသုံးနေကြ ကဒ်မို့လို့ပိုက်ဆံအတော်များများပါသွားတယ်။ ကဒ်ကလည်း စတစ်ကာ တွေဟိုဘက်ဒီဘက် လှလှပပကပ်ထားတော့ အတော်လေးနှမြောတယ်။ ပြန်လာရင်းမှ ဆိုင်မှာကျန်ခဲ့လားမသိဘူးဆိုပြီး ပိုက်ဆံရှင်းခဲ့တဲ့သူငယ်ချင်းဆီက receipt မှာပါတဲ့ ဖုန်းနံပါတ်ပြန်တောင်းပြီးဆက်ကြည့်လိုက်တယ်။ ကံများကောင်းချင်တော့ သူတို့သိမ်းထားတယ်လို့ပြောတယ်။ စတေကာတွေကပ်ထားတဲ့အကျိုးပေးချင်တော့ ကဒ်မှာပါတဲ့ စာသားတွေရွတ်ပြလိုက်တော့ ကိုယ့်ကဒ်ဆိုတာလည်း သေချာသွားတယ်။ မပျောက်ချင်ရင် အဲဒီလို ကပ်သီးကပ်သပ်ပြန်ရလာတတ်တယ်ဆိုတာပြောချင်တာပါ။ ဘာပဲဖြစ်ဖြစ် လက်မလျှော့ပါနဲ့။ တတ်နိုင်သမျှတော့ ကိုယ့်ပစ္စည်းကိုယ် ပြန်ရဖို့ကြိုးစားသင့်တယ်။

Ubuntu

ပြီးခဲ့တဲ့အပတ်က အိမ်က ပီစီကို ဖုန်ခါရင်း Ubuntu လေးဘာလေးပြန်သွင်းတာ Motherboard ကြွချင်ချင်ဖြစ်သွားတယ်။

ဘယ်ကတည်းက ကြွချင်နေတဲ့ Motherboard မှန်းမသိဘူး။ Ubuntu နာမည်ပျက်ဖို့ဖြစ်တာပဲ။

The Excellent creation

ပျင်းတဲ့အခါ Bedok MRT နားက ဈေးထဲလျှောက်သွားရင်း လျှောက်ဝယ်တတ်တယ်။ ကြက်သွန်ဖြူညှစ်တဲ့ ကိရိယာတွေ့လို့ အတော်ဝမ်းသာပြီးဝယ်သွားလိုက်တယ်။ စ လုံးအိမ်မှာ နေရတာ နေရာတကာအားနာနေရတယ်။ ညှော်မလား။ ထုထောင်းရင် ဆူညံသွားမလား။ စသဖြင့်တွေ။ များသောအားဖြင့် ဆီပြန်ဟင်းချက်တာကို ကန့်ကွက်တာကိုလည်း နားလည်မိတယ်။ ဆီငွေ့တွေပြန်သုတ်ရတာလည်းမသက်သာဖူးကိုး။ အိမ်ရှင်က သူ့ဘာသာသူ သန့်ရှင်းရေးလုပ်တယ်။ မီးဖိုနဲ့ ဘေစင်ကိုတော့ ကိုယ့်ဘာသာကိုယ်သန့်ရှင်းရေးလုပ်တယ်။ အခုတော့ ကြက်သွန်ဖြူတို့ ဂျင်းတို့ကို ညှစ်တယ်။ မထောင်းတော့ဘူး။ အဲဒီကိရိယာတီထွင်တဲ့သူကို Nobel ဆုပေးဖို့ နာမည်စာရင်းတင်သွင်းချင်တယ်။

Married Life Syndrome

စနေနေ့မျိုးတွေမှာ အဲဒီလို ရောက်တတ်ရာရာတွေ လျှောက်ဝယ်ရတာပျော်တယ်။ Happy Feet ကားထဲက Mumble အရုပ်ကို Bedok Point အောက်က အရုပ်ဆိုင်မှာတွေ့တာနဲ့ မိန်းမအတွက် ၀ယ်လာခဲ့တယ်။ လန်ကာဝီက Under water world မှာ ၂၀၀ RM ဆိုပြီး ဈေးတင်ပြီးရောင်းလို့ မ၀ယ်ခဲ့တဲ့အရုပ်ပဲ။ စင်ကာပူမှာ ၃၉ SGD ပဲရှိတယ်။ (နောက်မှပဲ အိမ်က အရုပ်တွေအကြောင်းပို့စ်တစ်ခုရေးမယ်။) အိမ်ထောင်ပြုလိုက်တဲ့အခါမှာ စကားပြောဖော်တစ်ယောက်ရတယ်။ ကာတွန်းကားအကြောင်းပြောရင် သူမကြည့်ဖူးတာများတယ်။ အဲဒီတော့ သူ့ကို ကာတွန်းကားတွေပြန်ပြရင်း revision ပြန်ရတယ်။ Pirates of the Caribbean ရှေ့သုံးကားလည်းပြန်ပြလိုက်တယ်။ ကျွန်တော့်သဘောကတော့ ကြည့်ရင် အစအဆုံးကြည့်စေချင်တယ်။ ကိုယ်က ၀မ်းသာအားရကြီးပြန်ပြောနေတုန်း ကြည့်ဖူးလားဆိုမှ ဟင့်အင်းဆိုရင် ခံစားရခက်တယ်။ အပြန်အလှန်အားဖြင့် ကျွန်တော်လည်း တစ်သက်နဲ့တစ်ကိုယ်မကြည့်လာတဲ့ မြန်မာကားတွေဘာတွေပြန်ကြည့်နေရတယ်။ မြန်မာကားတွေက ဘယ်လိုပြောရမလဲ။ မင်းသား၊မင်းသမီးနဲ့ အရံတွေကြားမှာ သရုပ်ဆောင်ပညာ ကွာဟလွန်းနေတာ၊ ဇာတ်လမ်းက ရယ်စရာကို သရုပ်ဆောင်မပီပြင်တော့သိပ်မရယ်ရတော့တာမျိုးတွေဖြစ်တယ်လို့မြင်တယ်။

Challenger Review

Bedok Point က Challenger မှာ အိမ်ဖုန်းတစ်လုံးဝယ်ဖို့ နာရီဝက်လောက်စာဖတ်လိုက်ရတယ်။ ပစ္စည်းတစ်ခုဝယ်ခါနီးရင် သူ့မှာပါတဲ့ functions, pros and cons တွေဖတ်ရတာ အတော်လေးဝါသနာပါတယ်။ ၀ယ်မယ့်ပစ္စည်းဆိုရင် မ၀ယ်ခင် သုံးလေးခါသွားကြည့်ဖြစ်တာများတယ်။ ဈေးကြောင့်မဟုတ်ဘူး။ ၀ယ်ပြီးရင် မကြိုက်မှာကို အတော်လေး စိုးရိမ်တတ်တယ်။ ၀ယ်ပြီးမကြိုက်လို့မသုံးရင် ဖြုန်းတီးရာရောက်တယ်လို့ထင်တယ်။ တကယ်လို့ ကိုယ်မလိုတာတစ်ခုခုရရင်လည်း လိုမယ့်သူပေးလိုက်တယ်။ ကိုယ့်မှာ မလိုဘဲ အပိုကြီးဖြစ်နေတာဘာမှမထားဘူး။ Philips ဖုန်းလေးတွေကမဆိုးဘူး။ ဒါတောင် မော်ဒယ်နည်းနည်းနိမ့်တာကို ၂၀ သက်သာလို့ယူလိုက်တာ နည်းနည်းလေး processing လုပ်တာနှေးနေတယ်။ ဥပမာ နံပါတ်ကို အမြန်ရိုက်ရင် သူက ခဏနားပြီးမှ နံပါတ်တွေပေါ်လာတယ်။ ဖုန်းအတွက် ဓာတ်ခဲကို alkaline တွေဝယ်ဖို့လုပ်နေလို့ ရောင်းတဲ့လူက မလိုဘူး၊ ပါပြီးသား။ ဓာတ်ခဲကလည်း alkaline မသုံးရဘူးဆိုမှ ပြန်ထားခဲ့ဖြစ်တယ်။ ဈေးဝယ်ရင်လည်း အရောင်းစာရေးတွေက ပြုံးပြုံးရွှင်ရွှင်ဆို စကားလေးဘာလေးပြောဖြစ်တယ်။ တစ်ချို့လည်းအတော်လေးကူညီကြပါတယ်။

Challenger က Member ၀င်ထားမှ အပြင်ကဈေးလောက်နဲ့ရတယ်။ :)။ ကောင်းတာတစ်ခုက Learning CD တွေတစ်ခါတစ်လေ တစ်ဝက်ဈေးနဲ့ Member တွေကိုရောင်းတယ်။ Funan ကဆိုင်မှာတော့ တစ်ချို့ကောင်တာတွေကလူတွေက သိပ်မပြေပြစ်ဘူး။ သည်းခံရတယ်။ သူတို့ အချိုးမပြေတိုင်း ဒေါသလိုက်ထွက်နေရရင် ကိုယ်ပဲအသက်တိုလိမ့်မယ်။

Cards

စင်ကာပူမှာ ကဒ်လှလှလေးတွေတော်တော်ဈေးကြီးတယ်ဗျ။ သူငယ်ချင်းမွေးနေ့အတွက် ကဒ်သွားဝယ်ရင်း Sorry Card တွေ၊ Thank You cards တွေဝယ်ထားဖို့ကြည့်တာ 8SGD ကနေ 15 SGD လောက်အထိတန်တဲ့ ကဒ်တွေပဲတွေ့တယ်။ ဈေးကြီးတယ်။ ခဏခဏ sorry တွေ thank you တွေမလုပ်နိုင်တော့ဘူး။ (E-card ပဲပို့ဖို့စဉ်းစားတော့မယ်။) ဈေးပေါတာတွေကြတော့ မလှဘူး။ ဖြစ်သလိုလုပ်ထားတယ်။ ၀က်ဝံပုံဆွဲရင် ဗိုက်ကပိန်နေတယ်။ ဖယောင်းတိုင်ပုံဆို စောင်းငန်းငန်းဖြစ်နေတယ်။ ရေးရမယ့်စာရွက်က ပြုတ်ထွက်နေတယ်။ အဲဒါတောင် 2 SGD။ အရင်ရုံးက Senior ရဲ့ မိန်းမက အဲဒီလိုကဒ်တွေကို လက်နဲ့ဆွဲတဲ့ လုပ်ငန်းလုပ်တယ်။ တစ်ကဒ်ကို ၂၀ လောက်ရှိတယ်။ သူရောအောင်မြင်လားမသိဘူး။ နောက်မှပဲမေးကြည့်ရဦးမယ်။ ကဒ်လှလှပပလေးတွေကို Hallmark မှာရတတ်တယ်။ Du Yi bookshop မှာလည်းရှိတယ်။ ငယ်သူငယ်ချင်းတစ်ယောက်ကတော့ ဈေးကြီးပြီး သေးသေးကွေးကွေးလေးတွေကို လက်ဆောင်ပေးရတာသဘောကျတယ်လို့ပြောတယ်။ ကျွန်တော်ကတော့ ဈေးကြီးကြီးသေးသေးကွေးကွေးလက်ဆောင်လေးတွေရတာ သဘောကျတယ်။

Noise Pollution and Stressful S'pore lifestyle

ဘေးနားကအိမ်မှာ သူငယ်ပြန်သလိုဖြစ်နေတဲ့အဘိုးကြီးတစ်ယောက်ရှိတယ်။ ညဆိုတော်တော်နဲ့မအိပ်သလို၊ မနက်ကြတော့ ၅ နာရီလောက်နိုးတယ်။ သူ့ဘာသာသူနေတာ အကြောင်းမဟုတ်ပေမယ့် နိုးနေတဲ့အခါ အော်ကြီးဟစ်ကျယ်ပြောနေတတ်တယ်။ အဲဒီတော့ Noise pollution ဖြစ်တယ်။ ကျွန်တော်ကတော့ သူဘာပဲပြောနေပြောနေ အိပ်နေရင် ဘာမှသိတာမဟုတ်ဘူး။ မိန်းမကတော့ ဆူညံသံနဲ့ အိပ်မရတဲ့အမျိုးဆိုတော့ အိပ်ရေးပျက်တယ်။ အိမ်ရှေ့မှာ ဈေးရှိတာ ကောင်းပေမယ့် ညဘက်ဆို သန့်ရှင်းရေးလုပ်တော့ အသံမတိတ်ဘူး။ ည ၁ နာရီလောက်မှ မြန်မာသီချင်းထဖွင့်တဲ့ အပေါ်ထပ်တစ်နေရာက မြန်မာတွေကိုလည်း ဘယ်သူမှမတိုင်ကြသေးဘူး။

စင်ကာပူမှာ ကောင်းကောင်းမွန်မွန်အိပ်လို့ရတဲ့အိမ်ရှာတွေ့ဖို့ဆိုတာ တကယ်တော့မလွယ်ဘူး။ တရားအရှာထွက်ရင် ဆရာမှားနဲ့တွေ့ကြသလို ဘယ်နေရာမှာနေနေ ဆူညံသံတစ်မျိုးမျိုးကြုံလေ့ရှိတယ်။ အဲဒါ သုံးနှစ်အတွင်း အိမ်ခြောက်အိမ်ပြောင်းဖူးတဲ့ ကျွန်တော့်အတွေ့အကြုံအရပဲ။

မလေးရှားမှာတော့ အတော်လေး အသံတိတ်တယ်။ အဲဒီလိုထင်တယ်။ ဒီနှစ်မှာ မလေးရှားကို သုံးခေါက်သွားတယ်။ မြန်မာပြည်ကို တစ်ခေါက်ပြန်တယ်။ နိုဝင်ဘာမှာတစ်ခေါက်ထပ်ပြန်ဖြစ်မယ်။ စင်ကာပူအပြင်ရောက်သွားတာနဲ့ ဘ၀ကြီးက ပိုပြီး အေးချမ်းသာယာသွားတယ်။ ဒါတောင် အလုပ်က အခုလို ပို့စ်လေးရေး၊ မျက်နှာထသစ်၊ အအေးသောက်၊ အပေါ့သွားနဲ့သက်သက်သာသာလုပ်ရတဲ့အလုပ်။ ဒါပေမယ့် ပတ်ဝန်းကျင်က စိတ်ပူလက်ပူပတ်ဝန်းကျင်။ ပြဿနာတွေက ရောက်လာရင် ပြူးတူးပြာတာတွေ။ အခုပဲ သေတော့မလို၊ ဒီ Error ကို ဒီနေ့မရှင်းရင် CEO ပဲအလုပ်ပြုတ်တော့မလိုလိုတွေ၊ over တွေသိပ်များတယ်။ သူတို့ရဲ့ အပူက လာလာဟပ်တယ်။ မနေ့ကလည်း ပြဿနာလေးတစ်ခုကို ရှိသမျှလူတွေဆီလိုက်ပို့နေတဲ့ user ကို Please don't make a false alarm. ဆိုပြီး ပြောလိုက်တယ်။

Exchange Rate

အခုတလော မြန်မာပြည်ကို ပိုက်ဆံပို့ရတာမကိုက်တော့ဘူးလို့ ဈမျဉ်းဇွဲ (ဇကွဲနားနီးတော့ ဈ လို့ခေါ်ရတယ်။) ကပြောတယ်။ အားလုံးမကိုက်တာတော့လည်းမတတ်နိုင်ဘူး။ ကံပဲ။ ကံသာအမိ၊အဖဆိုပြီး ကံကိုပဲလွှဲချလိုက်တယ်။ ဒေါ်လာဈေးတွေဒီလောက်ကျသွားတာတောင် မြန်မာပြည်က ကုန်ဈေးနှုန်းက တင်းခံနိုင်တာကို အံ့သြမိတယ်။ ဒီက ပိုက်ဆံပို့နေရတဲ့သူတွေသာ ကုန်ဈေးနှုန်းလို တင်းခံနေနိုင်ရင် ကောင်းမှာ။ ကျွန်တော်တို့လာခါနီးတုန်းက ၈၀၀-၉၀၀ ကြားမှာခပ်တည်တည်ကြီး ဈေးမြင့်နေတဲ့ ငွေကြေးက အခုလို ၆၀၀ ၀န်းကျင်မှာ ဖုတ်လှိုက်ဖုတ်လှိုက်ဖြစ်နေတာ သံဝေဂရမယ်ဆိုရင်ရစရာကောင်းတယ်။

Reading and Thinking About

အခု ဦးရွှေအောင်ရဲ့ ကုသိုလ်နှင့်အကုသိုလ်စာအုပ်ဖတ်နေတယ်။ ပင်နီဆူလာက ၅ ကျပ်နဲ့ဝယ်လာတာ။ တစ်လကို သုံးလေးအုပ်တော့ ပုံမှန်ဝယ်ဖြစ်တယ်။ ဘာမဆို စိတ်ဝင်စားတတ်တဲ့အတွက် စာဖတ်နေရရင် စိတ်ချမ်းသာတယ်။ အခုလို စာရေးနေရတာတောင် စာဖတ်နေရတာလောက် အရသာမရှိဘူး။ မြန်မာလူမျိုးတွေက မဟုတ်တဲ့နေရာမှာ ကပ်စေးအနည်းဆုံးလူမျိုးလို့ဆိုရမယ်။ နောက်ဆို စာအုပ်တွေကို အရည်ကျိုသောက်ရင် ဘီယာဖြစ်တဲ့စာရွက်တွေနဲ့ရိုက်ဖို့ကြိုးစားသင့်တယ်။ ဒါဆို စာအုပ်တွေလည်း ရောင်းကောင်းလာနိုင်တယ်။ ငယ်တုန်းက သိပ်မကြိုက်တဲ့စာအုပ်တွေတောင် ကြီးလာတော့ အရသာရှိလာတယ်။ အသက်ကြီးလာတာဟာ အတော်လေးကို နှစ်လိုစရာကောင်းတဲ့အရာပါပဲ။

စာအုပ်တစ်အုပ်ကို ၁၀ လောက်ပေးရတယ်ပဲထားလိုက်။ တစ်လကို အနည်းဆုံး ၁၈၀၀ လောက်ရတဲ့လူတစ်ယောက် စာအုပ်တစ်အုပ်ဝယ်တယ်ဆိုတာ ၀င်ငွေရဲ့ ၁၈၀ ပုံတစ်ပုံကို သုံးတာပဲရှိသေးတယ်။ ဒါပေမယ့် မ၀ယ်ဖြစ်ဘူး။ မ၀ယ်ဖြစ်တဲ့သူတွေများလာတော့ စာအုပ်ရောင်းတဲ့သူတွေလည်းမရှိတော့ဘူးဖြစ်လာတယ်။ ဖတ်ချင်တဲ့စာအုပ်အသစ်တွေရှိတယ်။ ဒါပေမယ့် မြန်မာပြည်ကို ပြန်မှာနေရတယ်။ ဒီမှာမရှိလို့။ ဒီမှာဝယ်လို့ရတဲ့စာအုပ်တွေကိုတော့ ပုံမှန်ဝယ်ဖြစ်တယ်။ ကျွန်တော်ထင်တာတော့ စာဖတ်တယ်ဆိုတာ အကုန်အကျနည်းတဲ့ ၀ါသနာတစ်ခုပါပဲ။ ကျန်တဲ့ဝါသနာတွေနဲ့ယှဉ်ကြည့်ရင်ပေါ့။

စာမဖတ်လို့မ၀ယ်ဘူးဆိုတဲ့သူတွေကိုတော့ ဘာမှပြောစရာကိုမရှိပါဘူး။ အရင်ကတည်းက မကြိုက်လို့မ၀ယ်တာကိုး။ တကယ်စာဖတ်တဲ့သူတွေအနေနဲ့ကတော့ မနှမြောစေချင်ဘူး။ ကျန်တာတွေကို နှမြောလိုက်ပါ။ ငါးကျပ်တစ်ဆယ်ကို စာအုပ်ဝယ်ဖို့မနှမြောလိုက်ပါနဲ့။ တစ်လကို ၁၀ ဖိုးလောက်ဝယ်ကြရင်တောင် စာအုပ်ဆိုင်တွေ အခြေအနေပြန်ကောင်းလာနိုင်သေးတယ်။ မဟုတ်ရင်တော့ နောက်ဆိုရင် စာအုပ်ဆိုင်မှာ ဘာစာအုပ်မှရောင်းတာမြင်ရမှာမဟုတ်တော့ဘူး။

Writers Review

မြန်မာပြည်ရဲ့ စာရေးဆရာလောကမှာဆိုလည်း မျိုးဆက်ပြတ်သွားပြီ။

နောက်ထပ်လူတော်တွေထပ်မထွက်လာတော့ဘူး။ ကဗျာမှာတော့ မျိုးဆက်မပြတ်သေးဘူး။ ကျန်သေးတယ်။ စာရေးဆရာလောကမှာတော့ Ctrl+C, Ctrl+ V တွေသိပ်များလာတယ်။ ဖတ်လိုက်တာနဲ့ ဘယ်စာအုပ် ဘယ်အကြောင်းက ဘယ်လိုခိုးထားသလဲသိသာနေတဲ့စာတွေများလာတယ်။ စာရေးဆရာဆိုတာ ကျန်တဲ့အကြောင်းအရာတွေထဲက ကူးရေးတာ ပြဿနာမဟုတ်ပေမယ့် နာမည်ကြီးစာရေးဆရာတစ်ယောက်ရဲ့ စာအုပ်ထဲက ပြန်မကူးသင့်ဘူး။ ပုံစံတူတွေ ပြန်မပွားသင့်ဘူး။ စာဖတ်တဲ့လူတွေလောက်မှ ဖတ်မထားတဲ့ စာရေးဆရာတစ်ယောက်ရဲ့စာကို ဖတ်စရာအကြောင်းကိုမရှိဘူး။ (ကျွန်တော့်အမြင်ပါ။ ပြည်သူ့သဘောထားတော့မဟုတ်ပါဘူး။)

Future Plan

စီးပွားပျက်ကပ်ကလည်းနောက်ထပ် ၁၀ နှစ်အတွင်းမှာ ထပ်ရှိနိုင်တယ်ဆိုလို့ ပိုက်ဆံလေးဘာလေးစုမှလို့ စိတ်ကူးထားတယ်။ ကိုယ်အခုလုပ်တတ်တာနဲ့ဘာမှမဆိုင်တဲ့ အလုပ်တစ်ခုခုကိုလည်း နောက်ဆယ်နှစ်လောက်မှာ လုပ်နေရနိုင်တယ်။ Pendulum swing ကပိုကျယ်လာပြီလို့ ပြောကြတယ်။ ဘ၀ဟာ အရင်လို အသေကြီးမဟုတ်ဘဲ flexibility ဖြစ်ရမယ့် အပိုင်းတွေက ပိုကျယ်ပြန့်လာပြီ။ သိပ်ပြီး ရှေးရိုးစွဲကြီးနေလို့မရတော့ဘူး။ အလိုက်သင့်ပြောင်းလဲရတယ်။အရင်တုန်းကထားခဲ့တဲ့တန်ဖိုးတွေလည်းအတော်လေးပြောင်းလဲသွားတယ်။ အတွေးအခေါ်အယူအဆမတူညီမှုတွေကိုလည်းပိုပြီး လေးစားလာတယ်။ အားလုံးညီညွတ်နေရင် ပျင်းစရာကြီး။

Chaos

ဒီနှစ်မှာ ကဗျာတွေပဲလှိမ့်ရေးမယ်လို့စိတ်ကူးလိုက်ကာမှ သုံးလအတွင်းတစ်ပုဒ်လားရေးဖြစ်တယ်။ ပြီးတော့မကြိုက်လို့သိမ်းထားလိုက်တယ်။ ရသစာပေတွေကို များများရေးဖို့လည်းကြိုးစားတယ်။ ရေးလက်စ စာတွေက 40 MB လောက်ရှိတယ်။ အဆုံးမသတ်နိုင်ဘူး။ ခံစားရတာတွေရေးနေမိလို့ဖြစ်နိုင်တယ်။ မခံစားရတွေပြောင်းရေးကြည့်ဦးမယ်။ လန်ကာဝီကိုလည်း တပိုင်းကျန်နေသေးတာ ဟိုတလောကမှသတိရတယ်။ မှန်မှန်ကြီးတိုးတက်လာတဲ့ ကိုယ်အလေးချိန်နဲ့ အိပ်ချိန်ရယ်၊ စိတ်ချမ်းသာမှုရယ်နဲ့အချိုးချကြည့်ရင်တော့ ဘ၀ဟာ မျှခြေအနေအထားမှာရှိနေပါသေးတယ်။

Excuses

အခုလို စကားစမြည်ပြောကြတာ မြန်မာ့အလေ့အထတစ်ခုပါပဲ။ မမြင်ဖူးပေမယ့် ဒီစာကို ဖတ်လိုက်တဲ့သူတွေကလည်း ကျွန်တော့်အတွေ့အကြုံကို သိလိုက်ရတာပေါ့။ အချိန်ရရင် လင်းဒီပတို့ မယ်ကိုးတို့လို အနုပညာပါတာလေးတွေလုပ်ချင်တယ်။ အခုတလော အာရုံကောင်းကောင်းမစိုက်နိုင်တာနဲ့ ရသစာပေတွေမရေးဖြစ်ဘူး။ အဖေများနေ့အတွက် ကဗျာတစ်ပုဒ်ရေးမယ်လို့စိတ်ကူးထားတယ်။ နောက်တစ်ခုက ကျွန်တော့်သူငယ်ချင်း ယမကာလုလင်ကြီးများအတွက် အရက်နာကျတဲ့အကြောင်းကို ဆောင်းပါးရှည်ကြီးရေးထားတာကို health corner မှာတင်ရမယ်။ Technical Blog အတွက်ရေးလက်စတွေလည်း ဒီနေ့လက်စသတ်ရမယ်။ လုပ်ချင်သလောက် အချိန်မရှိတဲ့အခါ စိတ်ကို အတော်လေးရှည်ရှည်ထားရတယ်။

Role Models

အရင်ခေတ်ကလူတွေ၊ အထူးသဖြင့် ဆရာမြသန်းတင့်၊ ပါရဂူ၊ ကြေးမုံဦးသောင်း တို့ကို သိပ်လေးစားတယ်။ သူတို့က သိပ်ကို productive ဖြစ်တယ်။ ကျွန်တော်တို့ခေတ်မှာ ငချွတ်တွေက သူတို့လို တော်အောင်ကြိုးစားသင့်တယ်။ အထူးသဖြင့်အခုဆို မောင်စူးစမ်းတို့လူထုစိန်ဝင်းတို့လို elite တွေနေရာမှာ gap ဖြစ်နေတာသိသာတယ်။ သူတို့တွေက ပြည့်ဝတယ်။ ကျွန်တော်တို့ခေတ်မှာလည်း သူတို့လိုတော်တဲ့သူတွေရှိစေချင်တယ်။ ကမ္ဘာမှာဖြစ်နေတာတွေကို လူငယ်တွေသိဖို့ စေတနာနဲ့အလုပ်လုပ်တဲ့လူတွေရှိဖို့လိုတယ်။ စာရေးဖို့ကြိုးစားတဲ့လူတော်တွေကိုလည်း ရှေးလူတွေလို အစိုးရနဲ့လက်ပွန်းတတီးနေလို့ နာမည်ပျက်တာတွေမဖြစ်စေချင်ဘူး။ ကိုယ့်ဘာသာကိုယ် ဂုဏ်သိက္ခာရှိရှိရပ်တည်တာကောင်းတယ်။

Gossip

အခုဆို စာပေစီစစ်ရေးမဖြတ်ရတော့ဘူး။ ဒါပေမယ့် ငြိတာပါရင် အယ်ဒီတာ သိန်းငါးဆယ်၊ ထုတ်ဝေသူသိန်းငါးဆယ်လို့ကြားတယ်။ အဲဒီဥပဒေကို စဉ်းစားမိတယ်။ (တကယ်လို့ သိန်းတရာရှိရင် ဒီလမှာ အမေကဗျာတစ်ပုဒ်လောက်ထည့်ဖို့ကြိုးစားမိမလားမသိဘူး။)

Conclusion

ဥပဒေဆိုတာ စိတ်ထဲရှိတာ သတ်မှတ်လို့ရတာမျိုးမဟုတ်ဘူးလို့မသိသေးတဲ့လူတွေပြောတဲ့ ဒီမိုကရေစီနိုင်ငံတော်သစ်ဟာ နိုင်ငံတော်ဟောင်းနဲ့လည်းသိပ်မထူးပါလားဗျာ။ ။

Regards,

The Gardener

Notes: ဟိုရောက်ဒီရောက်တွေဖြစ်နေလို့ခေါင်းစဉ်ပြန်ခွဲလိုက်တယ်။

အဆုံးအထိဖတ်သွားပြီးမှ ဘာမှလည်းမဟုတ်ပါလားလို့အံ့သြသွားစေချင်တာ။ အင်ဒီဝါးဟိုး ဒါရိုက်တာလုပ်ပြီး ဘာမှမဟုတ်တဲ့အခန်းကိုပဲ တစ်နာရီလောက်ရိုက်ထားတာမျိုးလေ။ ငြီးငွေ့စေတဲ့ရသတစ်မျိုးပေါ့။

Peace B with U.