ကဗျာဖတ်စာ(၁)

စာဖတ်ခြင်း ကခဂ (ABC of Reading) ဆိုတဲ့စာအုပ်မှာ ... ကဗျာဆရာ Ezra Pound က ပြောတယ်။ ကဗျာဆိုလိုရင်းမှာ အခြေခံသုံးပိုင်းရှိတယ်တဲ့ ...။ နံပါတ် တစ်က Melopoeia တဲ့။ (သူလည်းခမ်းနားချင်လို့ စကားလုံးအခက်ကြီးတွေသုံးပြတာနေမှာလို့ ဒီနေရာမှာတွေးမိသေးတယ်။) ကဗျာရဲ့ဂီတ ကိုပြောတာပါ။ ကဗျာမှာ သာယာတဲ့အသံဖြစ်ဖြစ်၊ မသာယာတဲ့အသံဖြစ်ဖြစ် အသံတစ်မျိုးတော့အနည်းဆုံးရှိတယ်။ အသံတွေက ညီချင်လည်းညီမယ်၊ ယိုင်ချင်လည်းယိုင်မယ်။ အသံတစ်မျိုးတော့ရှိတယ်။ အသံရဲ့သဘာဝကို နားလည်တဲ့ကဗျာဆရာဟာ ကဗျာရဲ့ညှို့ချက်အနေနဲ့အသံကိုသုံးတယ်။ ရှေးကဗျာတွေမှာအသံသာတာကိုသုံးတယ်။ ဆရာကြီးသခင်ကိုယ်တော်မှိုင်းတို့ကြတော့ ဖွဲ့နေတဲ့အဖွဲ့ပေါ်မှာမူတည်ပြီးအသံကိုပြောင်းလိုက်သေးတယ်။ ကြမ်းကြမ်းရမ်းရမ်းဖွဲ့တဲ့အခါ အသံတွေမာထန်လာတယ်။အသံတွေကို လိုသလိုကစားပြီး ဖွဲ့နွဲ့လိုက်တဲ့အခါ ကဗျာထဲက အသံတွေဟာ ရုန်းကြွသက်ဝင်လာတယ်။ ကဗျာရဲ့ Tempo ကိုစကားလုံးခွန်အားနဲ့ရောအသံနဲ့ပါ အတင်အချလုပ်ထားနိုင်တဲ့ကဗျာတွေမှာ ရသနှစ်မျိုးကိုတပြိုင်နက်ရသလို ကဗျာရဲ့ တိုးဝင်မှုဟာ သွက်လက်မြန်ဆန်ုလာတယ်။ ကဗျာမှာ အသံတစ်ခုရှိတယ်။ ဂီတလို့ Ezra Pound ပြောတာဟာ တင်စားတာဖြစ်နိုင်တယ်။ တစ်ချို့ကဗျာတွေရဲ့အသံဟာ ဂီတလို့ခေါ်ဖို့ခက်တယ်။ ဥပမာပေးရရင် musicals တွေ classics တွေနားထောင်နေတဲ့သူအဖို့ Punk, Alter နဲ့ Modern Rock အသံတွေဟာ ဂီတလို့သတ်မှတ်ရခက်ခဲလာသလိုမျိုးပေါ့။


ဒုတိယတစ်ခုကို Ezra Pound ကဆက်ပြောတယ်။ မပြောခင် ရေနွေးကြမ်းခွက်ကို ဆတ်ခနဲမပြီး ဂွပ်ခနဲမော့ချလိုက်သေးတယ်။ ထန်းကြောဖျာ တပတ်နွမ်းကြီးပေါ်မှာ တင်ပလ္လင်ခွေထိုင်ရင်း၊ ထန်းလျက်တစ်ခဲကို ခပ်တည်တည်ကောက်ဝါးပြီး ဆက်ပြောတာ။ ဒုတိယတစ်ခုက Logopoeia ။ ကဗျာရဲ့ အသိဉာဏ်နဲ့စပ်ဆိုင်တဲ့ အခြင်းအရာတဲ့။ ကဗျာမှာ ဘာမှမပါဘူးဆိုရင် ဘာလို့ကဗျာဖတ်ကြမှာလဲ။ ဗလာစာအုပ်လှန်ပြီးပဲသေချာခံစားနေတော့မှာပေါ့ ...။ ကဗျာမှာ အသိဉာဏ်ပါတယ်။ တစ်ခုခုကိုမရှင်းပြရင်တောင် တစ်ခုခုဆီကို သွားနေတဲ့ကဗျာလေးတွေကို ဖတ်ရတာ အသိတရားတစ်ခုခုကို ထိုးထွင်းသိမြင်စေတယ်။ ကဗျာဟာ အသိအမြင် အယူအဆတစ်ခုကိုပေးတယ်။ ဘာမှမပေးတဲ့ကဗျာလည်းရှိမယ်။ ရသအသိတစ်ခုပဲရိုးရိုးလေးပါတဲ့ကဗျာတွေလည်းရှိမယ်။ Ezra Pound မဖတ်ဖူးဘူးပဲထားလိုက်ကြရအောင်။ ဇင်ကဗျာတွေလို အခိုက်အတန့်တစ်ခုကို သုံးကြောင်းပဲရေးထားတဲ့ကဗျာမှာလည်း အသိဉာဏ်နဲ့ဆိုင်တာတွေပါတယ်။ သဘာဝဓမ္မတွေပါတယ်။ ဆိုလိုတာကတော့ ကဗျာရဲ့ယေဘူယျဂုဏ်ရည်ကို ထုတ်ကြည့်ရင် အသိအမြင်နဲ့စပ်ဆိုင်တဲ့အခြင်းအရာတွေပါလေ့ရှိတယ်။ ပါးပါးလေးပါတာလည်းရှိသလို ထူထူကြီးပါတာလည်းရှိတယ်။


တတိယတစ်ချက်ကတော့ Phanopoeia နိမိတ်ပုံဖန်တီးခြင်းလို့ဆိုပါတယ်။ နိမိတ်ပုံလို့သုံးလိုက်ရတာ မြန်မာစကားအနေနဲ့ဖလှယ်လိုက်လို့ နည်းနည်းမထိရောက်သလိုဖြစ်သွားပါတယ်။ သူက image လို့သုံးပါတယ်။ သူ့ image ဆိုတဲ့စကားလုံးကလည်း သူပြောချင်တာကိုမရောက်လို့ Ezra Pound က ရှည်ရှည်ဝေးဝေးဆက်ရှင်းပါတယ်။ နိမိတ်ပုံအပေါ်အာရုံပြုခြင်းဟာ အသံတစ်ခုဖြစ်ပေါ်လာသလိုမျိုးပါပဲ။ အသံဆိုတာ စိတ်ရဲ့စွမ်းအင်နဲ့ ရုပ်နဲ့ ထိခတ်မှုတစ်ခုဖြစ်ပေါ်လာတာပါ။ နိမိတ်ပုံရဲ့ အနက်ရှိုင်းဆုံး အဓိပ္ပာယ်ဟာ ကျွန်တော်တို့ရဲ့ ဖြစ်တည်မှုနဲ့တစပ်တဆက်တည်းကျနေမှုကို သိမြင်ခြင်းပါပဲတဲ့။ Ezra Pound ရဲ့ နိမိတ်ပုံဟာ အမှန်တကယ်ဖြစ်နေတဲ့လောကထဲမှာ ခြေတစ်လှမ်းချထားပြီးနောက်တစ်ဖက်က စိတ်ရဲ့အတွင်းပိုင်းမှာ ခြေချထားတယ်။ သူပြောချင်တဲ့ နိမိတ်ပုံက စိတ်အတွင်းကို တိုးဝင်နေတဲ့ နိမိတ်ပုံမျိုးလို့ ခန့်မှန်းရပါတယ်။ နိမိတ်ပုံမပါတဲ့ကဗျာဟာ ဘာဖြစ်လဲလို့မေးရင်တော့ ဘာမှမဖြစ်ဘူးလို့ပဲဖြေရမှာပါ။ Ezra Pound အမှတ်ခြစ်ပေးမယ်ဆိုရင်တော့ ဒီသုံးခုမပါရင် အမှတ်လျှော့ခံရကောင်းခံရမယ်ပေါ့လေ။


Ezra Pound က အရေးကြီးတာတစ်ခုပြောခဲ့ပါသေးတယ်။ "Make it new", အသစ်ဖြစ်အောင်လုပ်ပါတဲ့။ ပုံစံအဟောင်းနဲ့ တမျိုးတည်းရေးတာနဲ့တော့နည်းနည်းကွာပါတယ်။ ဆိုလိုတာက ကဗျာရေးတဲ့သူ၊ စာရေးတဲ့သူတွေမှာ ကိုယ်ပိုင်ဟန်တစ်မျိုးစီရှိတတ်ပါတယ်။ အဲဒီကိုယ်ပိုင်ဟန်ကတော့ အမြဲသစ်နေချင်မှသစ်နေပါမယ်။ စကားလုံးတွေကလည်း အဟောင်းတွေပဲဖြစ်နေနိုင်ပါတယ်။ ဒါပေမယ့် အတွဲအစပ် အသစ်တွေနဲ့ အဓိပ္ပာယ်အသစ်တွေကို အဟောင်းတွေထဲကလည်းထုတ်နိုင်ပါတယ်။ Ezra Pound ကိုယ်တိုင် Make it new ဆိုတဲ့စကားလုံးကို အသစ်ပြောခဲ့တာ ဟုတ်ချင်မှဟုတ်ပါလိမ့်မယ်။ သူ့ရှေ့မှာ တော်စတွိုင်းက "Make it strange" လို့ပြောခဲ့ဖူးလို့ပါ။ ဒီနေရာမှာတော့ Ezra Pound ဟာ ဂျပန်ကဗျာတွေနဲ့ ခလုတ်တိုက်မိပါတယ်။ ဂျပန်ကဗျာတွေက သစ်ဖို့မလိုဘူး။ သိမြင်ဖို့လိုတာဖြစ်လို့ပါ။ Ezra Pound ခြေထောက်နည်းနည်းနာသွားပါတယ်။ .....(ကြုံတဲ့အခါ ဆက်ရေးပါမည်။ ကြုံတဲ့အခါ ဖတ်လိုက်ပါ။)


ခင်မင်စွာဖြင့်
Zephyr

Peace B with U.