အောက်တိုဘာ နှင်းမြူများ
တစ်နေ့တာ၏ငြိမ်သက်သွားခြင်းသည် သီချင်းတစ်ခု၏ bridge တစ်ခုလို လှုပ်ရှားမှုတစ်ခုဆီ၊မြင့်တက်မှုတစ်ခုဆီသို့ အားယူနေဟန်တူသည်။ မျှော်လင့်ချက်သည် အလင်းရောင်နှင့်တူသည်ဟု ဆိုကြသည်။ အလင်းရောင်မလိုအပ်သော တောင်ပေါ်သစ်တော အောက်ခြေမှ ရေညှိပင်လေးတစ်ပင်အကြောင်းကိုသာ စိတ်ဝင်စားနေမိသည်။
ရေညှိပင်လေးတစ်ပင်သည် စိမ့်ဝင်စိုစွတ်ထားသော ရေမှုန်ရေမွှားလေးတစ်ချို့ကိုထွေးပွေ့ထားသည်။ သူ၏ဘဝသည်ထိုမျှသာဖြစ်သည်။ မြင့်မားရှင်သန်မှုမရှိ။ အရိပ်ကိုလည်းမပေး။ ပန်းပွင့်များလည်းဝေဆာချင်စိတ်ကင်းဝေးလျှက်။ ရေညှိအဖွဲ့အစည်းသည် စိမ်းလန်းသော စိုစွတ်မှုတွင်ပျော်ဝင်နေသည်။ နံရံတွင်ချိတ်ဆွဲထားသော အခရိုင်းလစ်ပန်းချီကား၏ အစိမ်းနှင့်တော့မတူ။ ထိုကားကတော့ ဆေးသားကို အမြန်ကုန်လျှင်ပြီးရောဟု သဘောထားကာ ဆွဲပေးလိုက်သည်ဆိုသော သူငယ်ချင်းပန်းချီဆရာ၏လက်ရာဖြစ်သည်။ အစိမ်းများစွာနှင့် ရေးဆွဲထားသော သူ့ပန်းချီကားကို အဝါဟု သူကနာမည်ပေးထားသည်။ စိမ်းစိုသော သစ်ရွက်တစ်ရွက်၏ နိဂုံးသည် အညိုရောင်ခြောက်သွေ့မှုဖြစ်လျှင် သစ်ရွက်တစ်ရွက်၏ ဇရာသည် အဝါရောင်ဖြစ်လိမ့်မည်။ ဗျာဓိလည်းဖြစ်နိုင်သည်။ ရေညှိပင်လေးတွင်တော့ ထူးကဲသည့် အမည်နာမ မရှိ။ ချိတ်ဆွဲခံဘဝသို့လည်းမရောက်။
အမြင့်ပေခြောက်ထောင်ကျော်သော alpine သစ်တောတစ်ခုတွင် သူနှင့်စတွေ့ခဲ့ခြင်းဖြစ်သည်။ ရေခဲလေ၏ အေးမြမှုနှင့်အတူ သစ်ပင်ခြေရင်းတွင် ကွေးကွေးလေးအိပ်နေသလိုဖြစ်နေသည့် ရေညှိပင်လေးတစ်ပင်တွင် အလှတရားရှိသည်။ သေးငယ်သောဖြစ်တည်မှုနှင့်အတူ ခမ်းနားသောတည်ရှိမှုကို ကျွန်တော်တွေ့ရှိခဲ့သည်။ tour guide ရှင်းပြမှုအရဆိုလျှင်၊ တောထဲတွင်လမ်းပျောက်နေသူတို့ကို ရှင်သန်စေခဲ့သော ရေရင်းမြစ်တစ်ခုလည်းဖြစ်နေသေးသည်။ သို့သော် ရေညှိ့ပင်လေးက ထိုကိစ္စနှင့်ပတ်သက်၍ ဂုဏ်ယူနေဟန် မတူ။ စုစုစည်းစည်းတည်ရှိနေသော သူ့မျိုးနွယ်စုတို့၏အကူအညီဖြင့် သစ်တောတစ်ခုကို ပျိုးထောင်နိုင်ခဲ့သည်။ ရေညှိပင်လေးတစ်ပင်၏ အံ့မခန်းစွမ်းအားဖြစ်သည်။ အေးစိမ့်နေသော သစ်တောလေးတစ်ခုကို ကိုယ်တိုင်တည်ဆောက်ထားပြီး၊ ထိုသစ်တောလေးထဲတွင် နှစ်နှစ်ခြိုက်ခြိုက် အိပ်နေရုံမျှသာ ဆန္ဒရှိသော ရောင့်ရဲလွယ် ရေညှိပင်လေးတစ်ပင်၏ အပိုဆာဒါးမပါသော ဘဝနေနည်းကို ကျွန်တော်သိပ်ကြိုက်သွားမိသည်။
သူဟာ ရေဓာတ်ကို အများကြီးသိမ်းထားတယ်။ သူ့အတွက်တော့မဟုတ်ဘူး။ သစ်တောအတွက်ပါလို့ တိုးဂိုဒ်က ရှင်းပြသည်။ ကိုယ့်အတွက်မဟုတ်တဲ့ စုဆောင်းခြင်းနဲ့နေနေတဲ့ ရေညှိပင်လေးတစ်ပင်ရှေ့မှာ ကိုယ့်အတွက် ရှာမီးမှုတွေနဲ့ လူသားတစ်ယောက် ငြိမ်ကျသွားတာပေါ့။ ရေညှိပင်လေးက ကျွန်တော့်ကိုမနှိမ်ပါဘူး။ သူ့အိပ်ရာနဲ့သူ၊ သူ့ဆောင်းခိုတေးနဲ့သူ၊ သူ့ဒဿနနဲ့သူ ငြိမ်းငြိမ်းချမ်းချမ်း အိပ်နေတာပါပဲ။ ခိုင်မာတဲ့ အမြစ်တွယ်မှုမရှိဘူး။ လွယ်လင့်တကူပေါက်ရောက်ပြီး၊ ရှင်သန်ခြင်းတန်ဖိုးမြင့်မားစွာနဲ့ သူ့ဘဝကိုဖြတ်သန်းနေသည်။
အမြင့်ပေထောင်ချီလာသည့်အခါတွင် သစ်ပင်များ မြင့်မားစွာမပေါက်ရောက်နိုင်တော့။ တောင်ထိပ်သစ်တောလေးသည် စိမ်းညို့နေသည်။ ပြုပြင်ထားသော သစ်တောတွင်းမှ သစ်သားလမ်းကလေးတွင်လျှောက်ရင်း အေးမြမှုကို စိတ်နှင့်နားလည်နိုင်ရန် အပြင်းအထန်ကြိုးစားနေသည်။ အပူရှိန်မြင့်သော ရှင်သန်ခြင်းဖြင့် အသားကျနေသောစိတ်သည် အေးချမ်းမှု၏ ဆန့်ကျင်ခြင်းကို အသည်းအသန်ခုခံနေဟန်တူသည်။ ဘာမှမလုပ်ခြင်းသည် တစ်ခုခုလုပ်နေခြင်းထက်တော့ခက်သည်။ တိတ်ဆိတ်မှုသည် ဆူညံသံတစ်ခုထက်တော့ ကြောက်စရာကောင်းနေသည်။ တောအုပ်၏ စိမ့်အေးမှုသည် ငယ်ဘဝ၏သီချင်းများဆီ ပြန်ဆွဲခေါ်သွားသည်။ ငယ်ဘဝ၏ ရေညှိပင်လေးတစ်ပင်ဆီ။ မျှော်လင့်ချက်ဖြင့်မနေထိုင်သော နေ့ရက်များဆီ။ စိမ့်အေးနေသော တိတ်ဆိတ်မှုသည် ဖလက်ရ်ှဘက်ခ် ရိုက်ချက်ဆန်ဆန် စိတ်ကိုဖြစ်သွားစေသည်။ အတိတ်နှင့် ပစ္စုပ္ပန်ကြားရှိ စိတ်ကူးယဉ်မျဉ်းလေးတစ်ကြောင်းသည် ရေညှိပင်လေး၏ အမြစ်တစ်ခုသာဖြစ်သည်။ ခိုင်မြဲစွာတွယ်ဆက်မထား။ ငြိမ်သက်စွာ ရပ်တည်နေရုံမျှသာ။
တောင်တန်းတစ်ခုသည် တောအုပ်တစ်ခုကို တင်ဆောင်ထားသည်။ သဘာဝတရားနှင့်အနီးဆုံးနေရာသို့ရောက်နေသည်။ တိမ်တိုက်များသည် ကျွန်တော်နှင့်အတူရှိနေသည်။ တောင်အောက်သို့ ငုံ့ကြည့်လိုက်လျှင်လည်း တိမ်မျှင်လေးများမြင်နေရသည်။ သဘာဝတရားသည် လုံလောက်သော အေးချမ်းမှုကိုပေးနေသည်။ အပြင်းအထန်ထိန်းချုပ်ထားသော ဆောက်တည်ရာမဲ့စိတ်တစ်ခု၏ ငြိမ်သက်ခြင်းကို တောအုပ်ထံမှ၊ တိမ်တိုက်ထံမှရယူနေသည်။ ရေညှိပင်လေး၏ ဘဝနေနည်းဖြင့် အအေးဓာတ်ကို စုယူနေမိသည်။
နောက်ထပ်မိနစ်အနည်းငယ်လိုအပ်နေသေးသည်။ အေးခဲထုံကျင်လာသော ခြေထောက်များနှင့် ဆန့်ကျင်လျှက် ရှင်းလင်းလွန်းသော စိတ်တစ်ခုသလည် ဟင်းလင်းပြင်ဆန်လာသည်။ မှိတ်ထားသော မျက်လုံးများမှ အပူဓာတ်ကို တောအုပ်မှ စုပ်ယူလျက်ရှိသည်။ ရေညှိပင်လေး၏ ငြိမ်သက်သော အိပ်စက်မှုကို လေးလေးနက်နက်နားလည်ဖို့ကြိုးစားရင်း အချိန်ကို တတိတိ ကုန်လွန်သွားစေခဲ့သည်။
တိုးတိတ်ညင်သာသော တယ်လီဖုန်းသံကိုကြားရသည်။ ဝေးလံသော ခရီးတစ်ခုဆီမှ လွင့်ပျံ့လာသော အိမ်မက်ဆန်သော တီးလုံးတစ်ခုဖြစ်သည်။ My chemical romance ၏ cancer သီချင်းဖြစ်လိမ့်မည်။ အေးစိမ့်သော သစ်တောထဲသို့ တိုးဝင်နေသော စိတ်ကို ခန္ဓာသို့ပြန်ကပ်လိုက်သည်။ ရှောင်လွှဲ၍မရသော တယ်လီဖုန်းခေါ်ဆိုမှုကို လက်ခံရဦးမည်။
"ညီလေး ... မေမေဆုံးပြီ"
ကြိုတင်သိရှိနေသော သတင်းစကားတစ်ခု၏ ပြင်းအားသည် အမြင့်ပေခြောက်ထောင်ကျော်တွင် ရပ်နေသော ရင်ဘတ်တစ်ခုကို ဗဟိုပြု၏ လှုပ်ခတ်သွားသော အင်းအားပြင်းငလျင်တစ်ခုစာ။ ........။
ဖုန်းခေါ်သူရော၊ ဖုန်းကိုင်သူပါ ဆိုစရာစကားမရှိတော့။ ................။
ရေညှိပင်လေးတစ်ပင် အိပ်ပျော်နေသည်။ အေးချမ်းသော သစ်တောတစ်ခု၊ တိတိကျကျဆိုရလျှင် သူစိုက်ပျိုးထားသော သစ်တောတစ်ခုတွင် အိပ်ပျော်နေသည်။ ငြိမ်းချမ်းစွာ အိပ်ပျော်နေသော ရေညှိပင်လေး၏ တိတ်ဆိတ်မှုကို ခံစားသိရှိနေသည်။ သစ်တောထဲမှ ထွက်ခွာလာချိန်တွင် ရေညှိပင်လေး ကျွန်တော့်စိတ်ထဲ ကပ်ပါလာသည်။ လက်ဝဲလက်ကို တိမ်မျှင်လေးကတွဲထားသည်။
အေးချမ်းစွာ၊ တိတ်ဆိတ်စွာ တောအုပ်လေးထံမှ ကျွန်တော်ပြန်လည်ထွက်ခွာလာခဲ့သည်။ သေခြင်းတရားသည် ချစ်ခင်သူတို့ကို ယူသွား၍ မရမှန်း ရင်ဘတ်ထဲမှ ရေညှိပင်လေးတစ်ပင်က သက်သေပြနိုင်ပါလိမ့်မည်။
ဆောက်တည်ရာကင်းမဲ့သောအဖြစ်၌ ဆောက်တည်ရာဖြစ်စေခဲ့သော ရေညှိပင်လေး၏ ကျေးဇူးတရားကို ပြန်တွေးလိုက်တိုင်း သစ်တောထဲ ကျွန်တော်ပြန်ရောက်သွားသည်။ အေးချမ်းတဲ့ဘုံဘဝမှာ ငြိမ်းချမ်းပါစေ မေမေ။
With Love,
Z
R.I.P mum. It had been six years.
Peace B with U.
