သန့်ရှင်းရေးသမား
နွေဦးတော်လှန်ရေး ရက် ၁၂၀ ကျော်လာခဲ့ပြီဖြစ်သည်။
တရပ်တကျေးမှ ကလေးအဖေတစ်ဦးသည် ရေချိုးခန်း သန့်ရှင်းရေးလုပ်လျှက်ရှိသည်။ မီးကို စတင်တွေ့ရှိသူမှာ မည်သူမှန်းမသိခဲ့သော်လည်း လက်အပူလောင်ခဲ့သူဖြစ်နိုင်သည်။ ပြဿနာအစသည် ဂျိုင်းပတ်စော်နံခြင်းမှစသည်ဟု ကနဦးအယူရှိသည်။ ပန်းသီးရှာလကာရည်ကို ရေတစ်ဝက်ဖြင့်ဖျော်သော် ပန်းသီးရှာလကာရည်အပျော့ (ဝါ) ဆိုက်ဒါပျော့ ရလေသည်။ ထိုအရာသည် ဘေ့စ် ပျော်ရည်ဖြစ်လေသည်။ အက်ဆစ်နှင့် ဘေ့စ်သည် အညမည အကျိုးပြုလေသည်။ ရှာလကာရည်အပျော့သည် အနံ့ပျောက်စေသည်။ ချိုင်းကို ပွတ်ထားပြီး အိပ်သော်၊ မနက်လင်းလာလျှင် ချိုင်းနံ့ဆိုးကင်းလေသည်။ ချိုင်းဟုရေးသော်လည်း ဂျိုင်းဟု ဖတ်လေရာ၊ ချိုဟုရေးသော် ဂျိုဟု ဖတ်ရာ မမချိုသည် မမဂျို ဖြစ်မသွားသော်လည်း သံချိုတေးများ ချိုသာစေကြောင်း ဆုမွန်တောင်းလေသည်။
မိမိ၏အားနည်းချက်မှာ မိမိဘာအားနည်းမှန်းမသိသော အချက်ဖြစ်ပါသည်။
ထို့ကြောင့်လည်း မိမိ မိန်းမယူလိုက်ခြင်းဖြစ်သည်။ အနည်းဆုံး ဇနီးသည်က သင့်အားနည်းချက်ကို သင့်ထက် ပိုသိပါလိမ့်မည်။ အိမ်ထောင်သက်ကြာလာလျှင် သင့်ကိုပါ ပြုပြင်ဖို့ကြိုးပမ်းပါလိမ့်ဦးမည်။ သို့သော် ဒီထက်ကြာလာလျှင် သူသည်လည်း မိမိကို ပြုပြင်၍မရနိုင်မှန်း ရိပ်မိသွားပါလိမ့်မည်။ ဤ တောင်တောင်အီအီ အတွေးများသည် မိမိ ရေချိုးခန်းသန့်ရှင်းရေး ရလာသော အတွေးများဖြစ်ပါသည်။ တကယ်တမ်းတွင်တော့ချိုင်းပတ်စော် ပြဿနာမှာ ဂလန်းများကြောင့် ဖြစ်သည်။ ဒုတိယအချက်မှာ ချိုင်းမွှေးဖြစ်သည်။ တတိယအချက်မှာ spice များစားသောကြောင့်ဖြစ်သည်။ လူသည် မှန်ကို ပွတ်တိုက်နေသော်လည်း ဦးနှောက်သည် ဖတ်ခဲ့သော စာများကို စားမြုံ့ပြန်နေသည်။ သားငယ်တုန်းက သုံးခဲ့သော ရေချိုးဆပ်ပြာများကို လွှင့်ပစ်ရင်း သူကြီးလာသောကြောင့် မိမိမှာ ကုန်ကျစားရိတ်သက်သာသွားပုံကို ပြုံးမိသည်။ ထိုမှ တစ်ဆင့် ပိုလာသော ပိုက်ဆံကို စုမလား ဖြုန်းမလား စဉ်းစားရပြန်သည်။ မျက်နှာဆိုင်မှ ဝယ်ယူထားသော မျက်နှာသစ်ဆပ်ပြာသည် သတိရမှ တစ်ခါ သုံးဖြစ်သောကြောင့် မကုန်နိုင်ဖြစ်နေသည်မှာ နှစ်ချီနေပြီဖြစ်သည်။ ဂဠုန်၊ ကာဠု ၊ ဠင်းတတို့သည် ဠ အက္ခရာအတွက် မနည်းရပ်တည်ပေးနေရသော စာလုံးများဖြစ်နေပြီး၊ လေးနှစ်ကျော်ကလေးတစ်ယောကို သင်ရသည်မှာလက်ဝင်ပါသည်။ ဘာမှမဆိုင်ဟုသင်ထင်စရာရှိသော်လည်း ဒက်ဒီ ရေးတာမှာ ဠ ကြီး မပါသေးဘူး ထည့်ရေးဆိုသည်နှင့် ရေးရခြင်းဖြစ်ပါသည်။ ကလေးအဖေတစ်ယောက်၏ အားသာချက်မှာ ကလေးရှိခြင်းဖြစ်ပါသည်။ ကလေးအဖေတစ်ယောက်၏ အားနည်ချက်မှာလည်း ကလေးရှိခြင်းဖြစ်ပါသည်။
ရေချိုးခန်းသည် သွားတိုက်ဆေးအဟောင်းများညှစ်ချပြီး ဆေးလိုက်လျှင် ပြောင်လက်လာပါသည်။ သွားတိုက်ဆေးအနံ့ကို သင်မကြိုက်လျှင် ပလုတ်ကျင်းဆေးရည်ဖြန်းပြီး အနံ့ပြောင်းနိုင်ပါသည်။ ထိုအနံ့ကို မကြိုက်သေးလျှင် ချိုင်းမွှေးရိတ်ရန် သုံးသော ဂျီလတ် အမြုပ်ဖြင့် မှန်သော်လည်းကောင်း၊ မျက်နှာသစ်ကန်ကိုသော်လည်းကောင်း သန့်စင်နိုင်သေးသည်။ ဤဥပမာသည် ဂဏန်းဥပမာပင်ဖြစ်သည်။ ဂဏန်းလက်မကို ထိန်းချုပ်ရန် ဂဏန်း၏ အခြားလက်ချောင်းထိပ်မှ အချွန်ကိုချိုးကာ လက်မအဆစ်ထဲထိုးထည့်လိုက်နိုင်သည်။ ထိုအရာကို ဂဏန်းလက်ထိပ်ခတ်သည်ဟုခေါ်သည်။ ရေချိုးခန်းသန့်ရှင်းရန် ရေချိုးခန်းသုံး သွားတိုက်ဆေး၊ ပလုတ်ကျင်းဆေးရည်၊ မုတ်ဆိတ်ရိတ်အမြုပ် စသည်တို့ကိုအသုံးပြုခြင်းမှာလည်း ထိုအတိုင်းပင်ဖြစ်သည်။ မြန်မာအခေါ် ငါးကြင်းဆီနှင့် ငါးကြင်းကြော်ခြင်းနှင့်များ ဥပမာ ပြုနိုင်မည်လားမသိ။
သန့်ရှင်းရေးသည် အတင်းအကြပ်မလုပ်ရလျှင် ပျေ်ာစရာကောင်းပါသည်။ နာရူတို၏ ဆရာ ကာကာရှီသည်လည်း သန့်ရှင်းရေးလုပ်ခဲ့ပါသည်။ အိမ်သာဆေးရပါသည်။ ကာကာရှိသည် အစွယ်ဖြူနင်ဂျာ၏ သားဖြစ်၍ ပါရမီရှင်လည်းဖြစ်ပါသည်။ သို့သော် အိမ်သာဆေးပါသည်။ အိမ်သာဆေးရန်အတွက်မူ ပါရမီရှိရန်မလိုပါ။ သို့သော် အိမ်သာကို ကျကျနနဆေးတတ်ရန် သင့်ထံတွင် စေ့စပ်မှုလိုပါသည်။ အထူးသဖြင့် အိမ်သာဆေးနေခြင်းကို သင်သဘောပေါက်ဖို့လိုပါသည်။ ညစ်ပတ်နေ၍ဆေးခြင်းမဟုတ်ပါ။ အစဉ်အလာမပြတ်၊ မင်္ဂလာနံနက်မှာ ဘုရားရှိခိုးသလို၊ စာအုပ်ဖတ်သလို၊ သင့်စိတ်ကို လွတ်လပ်ပေါ့ပါးစေရန် အိမ်သာဆေးနေခြင်းဖြစ်ပါသည်။ ဘုရားရှိခိုးခြင်း၊ သမထပွားများခြင်း၊ စာဖတ်ခြင်းနှင့် အိမ်သာဆေးခြင်းသည် ခြားနားခြင်းမရှိပါ။ သင့်စိတ်သည် အိမ်သာဖြစ်ပါသည်။ ဆေးထားလျှင် တောက်ပြောင်ပါသည်။ ဆေးရန် ဘရပ်စ်နှစ်မျိုးလိုပါသည်။ တစ်မျိုးမှာ စတုဂံပုံဖြစ်ရန်လိုပြီး၊ နောက်တစ်မျိုးမှာ စက်ဝိုင်းအခြေပြုရန်လိုပါသည်။ သို့မှသာ အပြင်အတွင်း၊ နှုတ်ခမ်းသားသင့်သန့်ရှင်းနိုင်ပါလိမ့်မည်။ ဆေးဖြန်းပြီး ခဏစောင့်နေခခြင်းသည် သင့်စိတ်နှင့်တူပါသည်။ သင့်စိတ်ကို လျှော်ဖွတ်ရန် အရင်ဆုံးသီလယူရပါသည်။ သီလသည် ကြွေကြေးချွတ်ဆေးဖြစ်ပြီး၊ သမထသည် ဘရှပ်နှင့် ပွတ်တိုက်ခြင်းဖြစ်ပါသည်။ ဝိပဿနာသည် ပြောင်လက်လာမှုကို ဆင်ခြင်ခြင်းဖြစ်ပြီး မဂ္ဂသည် တောက်ပြောင်သန့်ရှင်း ရနံ့သင်းသော ရလဒ်ဖြစ်ပါသည်။ အိမ်သာဆေးနေသော်လည်း သင်၏ အကျင့်တရားကို လက်မလွှတ်ထားသင့်ပါ။ ဆေးကြောသန့်စင်ပြီးသော အိမ်သာကို ရေခြောက်အောင်သုတ်ရင်း အိမ်သာတောင် သန့်အောင်ထားနိုင်ရင် ငါ့စိတ်ကို သန့်အောင်မထားနိုင်ဘူးလားလို့ သင်တွေးမိကောင်း တွေးနေမိနိုင်သည်။
သန့်ရှင်းရေးသမားသည် ကလေးအဖေဖြစ်သောကြောင့် ကလေးရှိပါသည်။ ကလေးရှိသောကြောင့်လည်း ကလေးအဖေဖြစ်ပါသည်။ အပင်မှ မျိုး၊ မျိုးမှအပင်ဆိုသည့် ကွန်ဆက်သည် အထွေအထူးမဟုတ်ပါ။ ချိုင်းမွှေးရိတ်ခြင်း၊ အိမ်သာဆေးခြင်း၊ ရေချိုးခန်းသန့်ရှင်းရေးလုပ်ခြင်းသည်လည်း သင်၏ ဘာဝနာလည်းဖြစ်နိုင်ပါသည်။ သွားကိုက်နေသောကြောင့်ပါရာစီတမော တစ်လုံးသောက်ရပါသည်။ သွားနှုတ်ရန် ရက်ချိန်းယူထားသောကြောင့် ဒီသွားသည် အနှေးအမြန် ထွက်ခွာသွားမည်မှာ သေချာပါသည်။ သို့သော် မိမိအား အနှောက်အယှက်မပေးပါ။ ကိုက်စရာရှိသောသွားသည် ကိုက်နေမည်ပင်ဖြစ်ပါသည်။ သောက်စရာရှိသောဆေးကိုသောက်ရင်း၊ သွားဆရာဝန်နှင့်ရက်ချိန်းယူထားဖို့တော့လိုပါသည်။ သံသရာသည် သွားကိုက်နေသော ဖြစ်စဉ်သာဖြစ်ပြီး မိမိတို့၏ စိတ်အထားအသိုများသည် အကိုက်အခဲပျောက်ဆေးဖြစ်နိုင်ပါသည်။ သွားကိုက်သက်သာစေနိုင်သော်လည်း သွားဆရာဝန်ဆီမသွားမချင်း၊ ဒီသွားကို မပြင်မချင်း ကိုက်မြဲကိုက်နေမည်သာဖြစ်သည်။ ဗုဒ္ဓသည် သွားနှုတ်ခိုင်းခြင်းဖြစ်ပြီး၊ တာအိုသမားများသည် အကြောထုတ်ခိုင်းပြီး ဆက်ထားထားစေခြင်းဖြစ်ပါသည်။ မိမိမှာမူ နှုတ်တန်သည်နှုတ်၊ အကြောထုတ်တန်သည်ထုတ်နှင့် အချိုဆက်စားနေသူ သန့်ရှင်းရေးသမားဖြစ်ပါသည်။ ဂနာဟိ မှတ်လော့ဟု မကြာမကြာပြောသူသည် မမှတ်သော ပရိတ်သတ်များကို ဟောနေသူလည်း ဖြစ်နိုင်ပါသည်။ တထာဂတသည် ရှိပြီးသည်များကို ထုတ်ပြညွှန်ကြားနေသူဖြစ်ပါသည်။ သန့်ရှင်းရေးသမားသည်ပြောင်လက်နေသော ရေချိုးခန်းကိုကြည့်ရင်း ပီတိကို စားနေသည်တမုံ့။ ။
Peace B with U.
